Albin Kurti: Rënie e domosdoshme për ngritjen e nevojshme!
Rënie e domosdoshme për ngritjen e nevojshme! Kështu u shpreh Kryeministri në detyrë, Albin Kurti, pas rrëzimit të qeverisë duke shtuar se mbledhja e djeshme e parlamentit do të ishte mirë të mbahej mend gjatë, mirëpo, nuk do të ndodhë kështu, sepse ai mendon se do të fitojnë.
“Qëllimi i mosbesimit nuk ishte rrëzimi i qeverisë sa dobësimi i qeverisjes. Ndërkaq kuptimi i mosbesimit ishte porosia ambasadorit Grenell: në Kosovë janë mbi 80 deputetë të gatshëm të rrezikojnë edhe jetët e qytetarëve vetëm që të kalojë shkëmbimi presidencial,” tha në reagimin e tij përmes rrjetit social Facebook, kryeministri i shkarkuar nga banda serbe në Parlamentin e Kosovës e kryesuar nga Isa Mustafa, duke shtuar se do të vazhdojnë si qeveri në detyrë sepse janë qeveri me detyra dhe jo qeveri e detyruar, që do të vazhdojë të merret me atë që banda e Isës nuk e përfill, COVID-19.
“Para së gjithash, duhet ta luftojmë bashkë pandeminë COVID-19. Mbi të gjitha, le t’i rrimë popullit afër se Kosova është shtëpia jonë.”
Ja statusi i plotë:
Ishte kjo një rënie e domosdoshme për ngritjen e nevojshme. Pa rënë qeveria si përbërje nuk bëhet dot qeverisja si përmbajtje. Jo se e kemi ditur, gjithsesi e morëm vesh.
Mbledhja e djeshme e kuvendit do të ishte mirë të mbahej mend gjatë. Mirëpo, nuk do të ndodhë kështu, sepse ne do të fitojmë. Pra, e ardhmja është e jona, ndërkohë që do ta humbim një tragjedi.
Ky kuvend nuk e beson këtë qeveri sepse i nënshtrohet qeverisë si të tillë. Qeveria jonë nuk e beson këtë kuvend sepse e dashuron kuvendin si të tillë.
Saktë e kishte thënë mbrëmë Prof. Enver Hasani: mosbesimi ishte koniuktural. Kur përfaqësimi demokratik bie në koniukturë politike, tjetërsimi bëhet normë.
Qëllimi i mosbesimit nuk ishte rrëzimi i qeverisë sa dobësimi i qeverisjes. Ndërkaq kuptimi i mosbesimit ishte porosia ambasadorit Grenell: në Kosovë janë mbi 80 deputetë të gatshëm të rrezikojnë edhe jetët e qytetarëve vetëm që të kalojë shkëmbimi presidencial.
Do të vazhdojmë si qeveri në detyrë. Jemi qeveri me detyra dhe jo qeveri e detyruar.
Para së gjithash, duhet ta luftojmë bashkë pandeminë Covid-19. Mbi të gjitha, le t’i rrimë popullit afër se Kosova është shtëpia jonë
