Albin Kurti: SHBA, mike e pazëvendësueshme për Kosovën!

Përjashtimin e Kosovës nga stërvitja ndërkombëtare ushtarake “Defender Europe 23” si sanksion i Shteteve të Bashkuara ndaj Kosovës për situatën e krijuar në veri, Kryeministri Albin Kurti e konsideron fatkeqësi.

Duke folur për RFE pas fjalës që mbajti në Konferencën për Siguri Globale në Bratislavë, “Globsec”, Albin Kurti foli edhe për takimin që zhvilloi me shefin e politikës së jashtme të Bashkimit Evropian, Josep Borrell, dhe të dërguarin e BE-së për dialogun Kosovë-Serbi, Miroslav Lajçak.

Si ishte takimi me përfaqësuesin e Lartë të BE-së, Josep Borrell, dhe të dërguarin e BE-së për dialogun ndërmjet Kosovës dhe Serbisë, Miroslav Lajçak?

Takimi ishte i rëndësishëm. Ne duhet ta kemi zbatimin ( e marrëveshjes Kosovë- Serbi), në rrugë të drejtë dhe mendoj se kemi pasur nganjëherë stagnim dhe nganjëherë largim nga rruga. Prandaj, për mua ishte shumë e rëndësishme të vij në Bratislavë për këtë takim dhe t’i takoj të dy ata, z. Borell dhe z.Lajçak, sepse duhet të ketë qartësi lidhur me ngjarjet e fundit në Kosovë të shkaktuara nga Serbia. Dhe, në anën tjetër, na duhet sa më herët që është e mundur, zbatimi i marrëveshjes.

Të mos harrojmë, ne kemi një marrëveshje, ne nuk kemi zgjidhje. Por, ne nuk kemi zgjidhje jo sepse nuk kemi marrëveshje, por sepse nuk kemi zbatim të marrëveshjes.

U mundova t’i bind Borellin dhe Lajçakun për fokus 100 për qind në kuptim të kohës dhe energjisë për të sekuencuar urdhërrëfyesin për zbatimin e marrëveshjes Kosovë-Serbi.

Por, a është sanksioni i SHBA-së një goditje për Kosovën?

Çfarë kemi parë është suspendimi nga ushtrimi “Defender Europe 23” dhe ne kemi qenë duke u përgatitur qe dy vjet për këtë. Është fatkeqësi. Nuk mendoj se është e drejtë, por kush jam unë të vendosi?!

Përsëri, më lejoni të theksoj se SHBA-ja është mike, partnere e aleate e pazëvendësueshme për sigurinë dhe mbrojtjen tonë, për demokracinë dhe zhvillimin tonë./RFE/