Albin Kurti: S’kam nevojë për 3 zëvendësa dhe 35 këshilltarë

Kryetari i Lëvizjes Vetëvendosje, Albin Kurti ka deklaruar se gjëja e parë që do të bëjë në qeveri do të jetë zvogëlimi i qeverisë dhe zgjerimi i shtetit duke shtuar se ai nuk ka nevojë për 3 zëvendësa dhe 35 këshilltarë.

Albin Kurti këto komente i bëri gjatë takimeve me qytetarët në Podujevë, ku tha se mbështetjen për prodhimin vendor, shpërndarje, por edhe në konsum, qeveria e Lëvizjes do ta garantojë përmes ligjit për mbrojtjen e prodhimit vendor.

“Shteti si konsumator do të jetë konsumues i prodhimeve vendor më së pari,” tha Albin Kurti ndërsa ishte i shoqëruar nga kandidatët për deputetë të Lëvizjes, Ajet Potera, Sabri Kiçmari, Shpejtim Bulliqi, Mevlyde Hyseni, Fitim Haziri, Fatmir Humolli dhe Fjolla Ujkani duke mbajtur fjalët e rastit.

Sabri Kiçmari tregoi gatishmërinë e qytetarëve dhe të Lëvizjes për t’i nxjerrur në pension qeveritë e deritanishme bashkë me mentalitetin e tyre. Ndërsa, Shpejtim Bulliqi shprehu bindje se fitorja e Lëvizjes do vijë falë bashkimit të qytetarëve të të gjitha gjeneratave që identifikohen me qëllimin tonë. E Ajet Potera u zotua për mbështetjen e duhur buxhetore për ushtrin.