Albin Kurti takim me Ambasadorin e SHBA, Philip Kosnett

Kryetari i Lëvizjes Vetëvendosje, Albin Kurti, sot priti në takim Ambasadorin e SHBA në Kosovë, Philip S. Kosnett, ku dhe i uroi Kurtit për një fushatë që adresoi shqetësimet e votuesve.

Ambasadori Kosnett shprehu kënaqësinë për mbarëvajtjen e procesit zgjedhor, pjesëmarrjen e lartë të qytetarëve ndërsa tregoi interesim të veçantë në përparimin kundër korrupsionit, për ekonominë, dhe për përparimin në dialogun me Serbinë, drejt arritjes së një marrëveshje gjithëpërfshirëse që do të sillte stabilitet dhe paqe të qëndrueshme në rajon.

Me këtë rast Albin Kurti e siguroi Ambasadorin Kosnett se do të jetë kryeministër për të gjithë qytetarët e Kosovës ndërsa e informoi se konsolidimi i brendshëm i Kosovës me shtetndërtim demokratik, sundim të ligjit, zhvillim ekonomik dhe progres shoqëror është prioritet që do ta zbatojë, meqë edhe nevojat e qytetarëve e vullneti i tyre i shprehur në këto zgjedhje ishte për këtë.  

Lidhur me dialogun, lideri i Lëvizjes Vetëvendosje tha se do të fillojë me serbët e Kosovës, nga poshtë lartë për zhvillim e integrim të serbëve qysh në javën e parë. Ndërkaq, në muajin e parë nevojitet takim me Përfaqësuesin e ri të lartë të BE-së për Siguri e Politikë të Jashtme, si për dialog me Brukselin, ashtu dhe për dialog me Serbinë sepse dialogu me Serbinë duhet të jetë i përgatitur mirë e me parime të qarta.

Paraprakisht do të kërkohet të mbyllet kapitulli i 33 marrëveshjeve të mëparshme, përkatësisht vlerësimi i zbatimit dhe i ndikimit të tyre. Nuk duhet të vonohemi por s’kemi as pse nxitohemi e bëjmë gabime që na kushtojnë pastaj.  

Në fund të takimit, të dy palët shprehën interesimin për komunikim të vazhdueshëm e takime të mëtutjeshme.