Albin Kurti takim me Komandantin e KFOR-it
Kryeministri Albin Kurti ashtu siç kishte paralajmëruar, ka pritur sot në takim komandantin e KFOR-it, Michele Risi.
“Në një atmosferë shumë miqësore u rikonfirmua përkushtimi për bashkëpunim të afërt ndërmjet kryeministrit dhe komandantit të KFOR-it, përbrenda mandateve që kanë,” thekson Zyra e Kryeministri përmes një njoftimi duke shtuar se kryeministri shprehu falënderimin në emër të qytetarëve të Kosovës për rolin e vazhdueshëm të KFOR-it në sigurimin e paqes dhe stabilitetit në gjithë territorin e Kosovës.
“Kryeministri vuri theksin në qëllimin e integrimit të Kosovës në NATO si aspiratë që do të realizohet domosdoshmërisht në të ardhmen. Në këtë fazë, bashkëpunimi i KFOR-it me Ministrinë e Mbrojtjes është i një rëndësie të veçantë,” thekson njoftimi.
Komandanti i KFOR-it tha se nën mandatin e tij të OKB-së, KFOR-i do të vazhdojë përpjekjet e tij për të ofruar një mjedis të qetë dhe të sigurt dhe liri të lëvizjes për të gjithë njerëzit e Kosovës, thekson Zyra e Kryeministrit duke shtuar:
“Ai gjithashtu ritheksoi rëndësinë e vazhdimit të dialogut Kosovë-Serbi, si dhe angazhimin për koordinim institucional në interes të sigurisë në Kosovë.”
Më pas, Komandanti i KFOR-it e njoftoi Kryeministrin se, nën mandatin e KFOR-it, dhe në kuadër të përgjegjësive të menaxhimit të hapësirës ajrore të autoriteteve të NATO-s, me ndihmën e Hungarisë dhe Islandës, po vazhdojnë përpjekjet për hapjen e korridoreve të reja ajrore.
Në fund të takimit, bashkëbiseduesit shprehën edhe një herë gatishmërinë për derë të hapur për komunikim dhe bashkëpunim të vazhdueshëm. Komandanti i KFOR-it i dorëzoi kryeministrit Stemën e Komandantit të KFOR-it.
Albin Kurti ishte i shoqëruar nga Zv/kryeministri, Haki Abazi, ndërsa komandanti i KFOR-it, Gjeneral Major, Michele Risi, nga asistenti i tij ushtarak, kolonel lejtnant, Dario Paduano, dhe këshilltari politik, Alexander Aalmo.
Ndryshe, ky takim u paralajmëru dje nga Kryeministri Albin Kurti pasi zbuloi “marrëveshjen sekrete” të Presidentit Hashim Thaçi dhe Sekretarit të Përgjithshëm të atëhershëm të NATO-s, Anders Fogh Rasmussen, përmes së cilës i bartet KFOR-i e drejta absolute e vetos mbi të gjitha misionet e ardhshme të FSK-së në veri të Kosovës, për periudhë, paafat.
