Albin Kurti: Të drejtat e njeriut, themeli i qytetërimit!
Në hapjen e Javës së të Drejtave të Njeriut në Kosovë, Kryeministri Albin Kurti tha se të drejtat e njeriut, janë themeli i qytetërimit.
“Gjithçka bëhet aq e vështirë, sa që e pamundur nëse nuk besojmë në të drejtat e njeriut, dhe gjithçka bëhet aq e lehtë pothuajse, menjëherë e realizueshme atëherë kur besojmë në të drejtat e njeriut,” tha Albin Kurti dhe në frymë të partneritetit ndërmjet Qeverisë së Kosovës dhe organizatave të shoqërisë civile, ai bëri thirrje që të vazhdohet me diskutime të hapura, sidomos aty ku konstatohen shkeljet e të drejtave të njeriut.
Me këtë rast Kryeministri i Kosovës përmendi disa kategori, siç janë pakicat etnike, komuniteti LGBTIQ+, të varfrit, të pashkolluarit, të paarsimuarit dhe ndaj atyre që i kanë aftësitë e kufizuara apo jetojnë me nevoja të veçanta.
“Me të gjithë këta, solidaritet, bashkëpunim për barazi edhe për dinjitet. E uroj që këto platforma për diskutim sikurse edhe kjo konferencë të shërbejnë për shkëmbime të dobishme e frymëzim të ri,” tha Kryeministri i Kosovës, Albin Kurti, në fund të fjalës së tij.
Ndryshe, kjo është Konferenca e dhjetë e hapjes së Javës së të Drejtave të Njeriut që organizohet nga Nisma e të Rinjve për të Drejtat e Njeriut, YIHR, dhe e treta me radhë ku merr pjesë Kryeministri i Kosovës, Albin Kurti.
