Albin Kurti vazhdoi sot me takimet konsultative për formimin e qeverisë

Kryeministri Albin Kurti sot ka vazhduar me takime konsultative për formimin e qeverisë.

Ditën e ka filluar me takimin me Duda Baljen nga Bashkimi Socialdemokrat dhe Veton Berisha nga Partia Liberale Egjiptiane të cilët pas takimit u shprehën se nuk ia kanë dhënë konfirmimin kryeministrit Albin Kurti nëse do ta mbështesin për mandatin e tretë sepse as ai nuk e konfirmoi nëse do t’i plotësojë kërkesat e tyre për komunitetet që përfaqësojnë, boshnjakë dhe egjiptianë.

Si Balje, ashtu edhe Berisha e kanë lënë të hapur mundësinë e dakordimit në takimet e ardhshme para seancës konstituive që pritet të mbahet më 15 prill. Që të dy janë takuar edhe me opozitën, për të cilët kanë pasur kërkesat e njëjta.

“Sot u takova me kryeministrin, i parashtrova kërkesat që kemi si boshnjakë, nuk kemi marrë konfirmim dhe nuk kemi dhënë konfirmim. Është takimi i parë. Jemi në fazën e bisedimeve,” tha sot Balje pas takimit me Kurtin ndërsa Berisha sqaroi:

“Biseduam për një bashkëpunim të mundshëm mes nesh. Ne në parim nuk kemi vija të kuqe me askënd Për pjesë. Normalisht qe ne patëm kërkesat tona për nevoja të komunitetit. Ne do të jemi në kuvend në ditën kur do të mbahet seanca konstituive, sepse jemi pjesë e Kuvendit.”

Kërkesat e Duda Baljes janë krijimi i një komune boshnjake, reforma në arsim dhe tretmani i barabartë me të gjitha partitë e tjera që kanë nga një deputet. Ndërsa Berisha kërkoi investime në infrastrukturë sa i përket komunitetit, investime për shkollim, por dhe në aspektin ligjor pasi që ka diskriminim.

Takimi i radhës ishte me deputetin e Koalicionit Vakat, Rasim Demiri, me të cilin Albin Kurti ka bashkëpunuar edhe në dy mandatet e para ndërsa bëri të ditur se kishte kërkesë për themelimin e komunës Reçanit. 

“Kemi biseduar për shumë gjera, edhe ne edhe kryeministri kemi shprehur gatishmërinë për formimin e institucioneve dhe qeverisë së Kosovës. Më shumë sot bisedimet kanë qenë për më tutje për bashkëpunim, kemi folur për gjera që janë të rëndësishme për komunitetin boshnjak, kemi folur për kërkesën për komunën e Reçanit,” tha Rasim Demiri pas takimit duke mohuar se themelimi i i kësaj komune ishte kusht.

Ndërkohë Kurti ka takuar edhe kryetarin e Partisë së Romëve të Bashkuar të Kosovës, Albert Kinolli. Pas takimit ai sqaroi se partia e tij nuk ka vija të kuqe ndaj asnjë subjekti politik, por respekton rezultatin zgjedhor.

“Ne si subjekt politik rom kemi parashtruar kërkesat tona që njëra ka qenë që të jemi të barabartë me të gjitha subjektet e tjera që janë me një vijë me ne. Po presim 15 prillin. Besojmë që Kurti do t’i ketë numrat e nevojshëm dhe do të japim edhe ne kontributin tonë. Në interesin tonë është të formojmë institucionet sa më parë,” tha Albert Kinolli.

Kryeministri Albin Kurti, priti sot në takim edhe Kryetarin e Partisë Demokratike Turke të Kosovës aktualisht ministër i Zhvillimit Rajonal, Fikrim Damka, i cili së bashku me Kryetarin e Komunës Mamushë dhe Nënkryetarin e KDTP-së, Abdülhadi Krasniç, konfirmuan vijimësin e bashkëpunimit.

Kryetari i Lëvizjes Vetëvendosje, Albin Kurti, gjatë ditës së djeshme ka nisur konsultimet me pakicat për formimin e qeverisë së re. Votat ia kanë konfirmuar Kryetarja e Partisë së Re Demokratike nga komuniteti boshnjak, Emilija Rexhepi, Kryetari i Partisë për Liri, Drejtësi dhe Mbijetesë nga komuniteti serb, Nenad Rashiç, dhe Kryetari i Partisë Iniciativa e Re Demokratike e Kosovës, Elbert Krasniqi.

Ndryshe, komunitetet joshumicë në Kosovë kanë 20 ulëse të garantuara në Parlament, dhjetë i takojnë komuniteteve joserbe, dhe dhjetë të tjera komunitetit serb. Lista Srpska në zgjedhjet e 9 Shkurtit ka fituar nëntë nga dhjetë ulëset e komunitetit serb.

Ndërsa dy partitë opozitare, LDK dhe AAK , kanë hedhur poshtë mundësinë e bashkëqeverisjes me Lëvizjen Vetëvendosje, por, PDK dhe Nisma Socialdemokrate nuk kanë vendosur vija të kuqe për koalicione.

Me dekret të Presidentes Vjosa Osmani, seanca konstituive e Parlamentit të Kosovës do të mbahet më 15 prill.