Albin Kurti: Vetëmenaxhimi s’bëhet Asociacion!
Kryeministri i Kosovës, Albin Kurti është i bindur se për shkak se Kosova e ka tekstin e favorshëm, bëhet gjithë kjo luftë politike kundër Kosovës, me ofansivë joparimore e të padrejtë.
“E çka mendon për Asociacionin, e si do të jetë Asociacioni? Po t’i shikojmë një herë këto katër nenet e para ku thotë se Serbia nuk do të bëjë kundërshtime për anëtarësimin e Kosovës në çdo organizatë ndërkombëtare,” tha Kryeministri i Kosovës duke folur në një intervistë për televizionin publik, RTK, për zhvillimet e fundit politike, ekonomike, shëndetësisë, sigurisë e arsimit në vend.
“E çka i bjen kjo kur një shtet deklaron kështu? Ose çfarë është kur në marrëveshje shkruan se në asnjë vend tash e tutje, nuk do ta përfaqësojë Kosovën”, tha ai, duke elaboruar edhe pikën tjetër të njohjes së simboleve e dokumenteve të Kosovës nga ana e Serbisë.
“Thirrja në principet e Kartës së Kombeve të Bashkuara,është një tjetër. Pra unë besoj se në vend që me këto ne të jemi në ofansivë, jo vetëm unë si kryeministër, por si shoqëri në arenën ndërkombëtare, nuk do të duhej që kaq lehtë ta pranojmë ofensivën e Serbisë për një formulim që nuk ekziston në tekst,” tha ai duke shtuar se duhet shumë kreativitet e imagjinatë që Vetëmenaxhimi të bëhet Asociacion.
“Me aq sa kam vërejtur e kam pasuur kohë, në studio televizive, të gjithë janë bërë artistë, se si ta interpretojnë Vetëmenaxhimin si Asociacion a fjala Asociacion nuk e ke”.
Në këtë rast ai tha se fjalën e ka për disa analistë politikë, të cilët sipas tij, në vend se ta ndihmojnë ofensivën e Kosovës me katër pikat e para të marrëveshjes, provojnë ta gjejnë fjalën Asociacion që nuk është askund.
Kurti: Me marrëveshje, statusi i Kishës Ortodokse është veç formalizim
Duke folur për Kishën Ortodokse Serbe, kryeministri Kurti deklaroi se në marrëveshje shkruan formalizim i statusit.
Sipas tij, se kjo nuk do të thotë ndryshim, dhe ky formailizim, nënkupton atë që e ke diçka, por që do që të formalizohet.
Kryeministri Kurti u shpreh se edhe në bisedimet e zhvilluara në Ohër, ua ka thënë këtë.
”U thash se sa e di unë, Serbia është shtet sekular. Pra, për formalizim të statusit, u thash se jam i interesuar të bisedoj hapur me Patriarkun Profirije”, sqaroi Kurti.
Ai tha se ndërmjetësve evropianë dhe presidentit të Serbisë u ka thënë se nuk ka kuptim që një institucion relegjioz të përfaqësohet nga zyrtarë të një shtet sekular.
Kurti tha se atij i është thënë se Patriarku refizon të takohet me të. “Jam i vetmi kryeministër që i kam dy vjet mandat dhe ata refuzojnë të takohem”.
Kurti: Serbia s’i ka ratifikuar marrëveshjet, prandaj edhe ne presim
Kryeministri Kurti tha se marrëveshja e Ohrit është njohje de-facto e Kosovës nga Serbia.
Por, sa i përket qëndrimeve të opozitës, tha se veprimet e kryetarëve të partive PDK e LDK, e kanë sjellë këtë situatë.
“Mendoj shpesh se si do të dukej procesi i dialogut sikur ata mos të kishin nënshkruar këto marrëveshje, në çka do të kapej Serbia”.
Ai u shpreh se nuk ka çfarë të thotë më shumë, kurse sa i përket mbështetjes, deklaroi se është i gatshëm të japë përgjigje në Kuvend të Kosovës.
Kurti deklaroi se është i interesuar të dëgjojë edhe të tjerët. “Sepse Serbia nuk i ka ratifikuar këto marrëveshje në Parlament. Prandaj dua të dëgjoj edhe të tjerët”.
Ai tha se sot duhet të pyetën të gjithë zyrtarët ndërkombëtarë se çfarë mendojnë për deklaratën e Presidentit të Serbisë që do ta shkelë nenin 4 të marrëveshjes.
“Nuk kam çfarë të flas më shumë për këtë. Unë jam në pozicion të favorshëm gjithmonë, por tash është edhe Kosova. Kosova nuk ka nevojë të jetë në defansivë”, tha ai, duke shtuar se për shkak të marrëveshjes së favorshme, bëhet kjo luftë për Asociacionin.
“Tash duhet shumë kreativitet e imagjinatë që vetëmenaxhimi të bëhet Asociacion. Tash janë bërë shumë artista edhe në studio televizive se si Vetëvenaxhimi të bëhet Asociacion,” tha Kurti duke sqaruar se fjalën e ka për disa analistë politik.
“Provojnë të gjejnë fjalën Asociacion që nuk është askund”.
Kurti: Vetëmenaxhim nuk është vetëqeverisje
Duke folur për çështjen e Asociacionit, kryeministri Kurti tha se ka një të tillë në marrëveshje, e kjo është në nenin 10, ku palët obligohen të zbatojnë marrëveshjet e kaluara.
Megjithatë ai tha se janë 39 marrëveshje që nga 2011. “Janë edhe marrëveshja për kthimin e librave kadastralë, diplomat, ajo e parimeve etj”.
Kurti u shpreh se është një thes me marrëveshje e duhët trajtuar me kujdes.
“Nuk e mohoj një gjë të tillë, por ajo në nenin 7 ku i referohet komunitetit serb, kemi qenë kreativ, ku siç thuhet, vetëmenaxhimit, e simodomos ofrimit të shërbimeve për ta”.
Kryeministri deklaroi se në këtë rast kjo ka të bëjë me shërbime e jo struktura. “Niveli i vetëmenaxhimit, pa rrezikuar rendin Kushtetues të Kosovës”.
Ai tha se ka bërë vazhdimisht oferta. “Në momentin kur bëra ofertë, pala tjetër kërcënoi për ndërprerje të bisedimeve”.
Kurti tha se oferta ishte qartë për statutin e Asociacionit. “Kam kërkuar tri shtylla të Asociacionit. Nëse jemi dakord, u kam thënë, me Kushtetutën dhe vendimin e Gjykatës, me qëndrimin evropian e amerikan, në këto tri shtylla, unë nesër ua sjell draftin e statutit”.
Ai është shprehur se palëve u ka thënë se do tu sjellë propozim që as vetë ata nuk mund ta refuzonin. Kryeministri tha se të gjithë ishin në hotel dhe në mëngjesin e 19 marsit, kanë mundur ta kenë draftin duke u bazuar në këto tri shtylla.
Ai tha se vetëmenaxhim nuk është vetadministrim e as vetëqeverisje.
“Thotë vetëmenaxhim i komunitetit serb e jo komunave të serbe të Kosovës”, tha Kurti.
Sipas tij, kur thuhet vetëmenaxhim i komunitetit serb dhe përmendet Këshilli i Evropës, e ke në kornizë për mbrojtjen e pakicave kombëtare.
Duke sqaruar, sa i përket Asociacionit, kryeministri më tej tha se qëndrimi i BE-së bazohet në vendimet e paraardhësve të tyre në këto pozita.
“Kur mua më thonë se parardhësit tuaj kanë nënshkruar dhe duhet zbatuar marrëveshjet, edhe ata kanë paraardhës dhe ata kanë garantuar se Asociacioni nuk do të ketë kompetenca ekzekutive”.
Kurti: Marrëveshja është njohje de-fakto nga Serbia
Sa i përket konstruktivitetit të tij në këtë proces, kryeministri Kurti tha se gjithmonë ka qenë i tillë.
“I lexoj mirë tekstet dhe kur shoh se ka koncepte universale si kjo, kur e ke brenda pavarësinë, integritetin territorial, barazinë e palëve, atëherë jam konstruktiv”.
Më tej kryeministri Kurti, duke folur në RTK për këtë marrëveshje, u shpreh se vetë ka pranuar ta nënshkruajë, por është shfaqur edhe destruktiviteti i Serbisë.
“Unë isha e vetmja palë që kam propozuar ide dhe kam qenë aktiv. Por sa më aktiv e kreativ që bëhesha, aq më shumë ngjallej rezistenca e palës tjetër që u kurorëza me mos nënshkrim sepse edhe ata e dinë siç e di edhe unë që kjo është de-fakto njohje e Kosovës”.
Kryeministri Kurti u shpreh se sa i përket tekstit dhe negociatave të këtij dialogu, prej që merr pjesë, pa barazi nuk ka proces.
Kurti tha se barazia e palëve është fakt i pacënueshëm. Duke u pyetur se çfarë ka problem me këtë dokument-marrëveshje, ai tha se është fakti që mund të ketë edhe gjëra të tjera që do të mund të përfshiheshin në marrëveshje.
“Por në parim është bazë shumë e mirë dhe mendoj se nuk ka diçka substanciale që e bën këtë marrëveshje të papranueshme, andaj e kam pranuar”.
Kryeministri tha se nuk mund të normalizohen marrëdhëniet pa adresuar çështjet e së kaluarës, e jo vetëm me ato që lidhen me të kaluarën.
“Tashmë në aneks e kemi me urgjencë çështjen e të pagjeturve, e që është urgjente që duhet të adresohet”.
Kurti: Ka marrëveshje edhe pa nënshkrim
Duke folur për marrëveshjen Kosovë-Serbi, kryeministri Kurti shpjegoi se edhe pse nuk ka nënshkrim, megjithatë ka marrëveshje. Kjo ngase ndërmjetësi evropian, sipas tij, në këtë rast vetë BE-ja, ka konstatuar një gjë të tillë.
“Jo vetëm kaq, por 27 shtete, në mbledhjen e tyre me 29 shkurt, e kanë pranuar këtë marrëveshje”, tha ai.
Kryeministri deklaroi se ka indikacione edhe fakte se Serbia po bën shkelje të marrëveshjes. “Por unë pres nga BE e SHBA që sjelljen destruktive të Serbisë, ta gjykojnë e dënojnë”.
