Albin Kurti: Vetëvendosje do ta lëvizë Mitrovicën dhe Trepçën përpara

Kandidati për Kryeministër i Lëvizjes Vetëvendosje, Albin Kurti, duke shprehur bindjen për fitore në zgjedhjet e 6 tetorit, tha nga Mitrovica se dita e Vetëvendosjes po vjen dhe se është momenti i fundit për ta shpëtuar vendin nga politikanët e pangopur.

“Hajnat në burg. Këtyre që i futën duart në maxhen e fukarenjëve nuk ju besohet, mashtrimeve të tyre u ka ardhur fundi e erdhi dita jonë, erdhi dita e minatorit, e punëtorit, nxënësit,” tha Albin Kurti duke shtuar se është koha të investohet në arsimim, të ngjallet ekonomia, ndërsa Lëvizja Vetëvendosje do ta lëvizë Mitrovicën dhe Trepçën përpara.

Me këtë rast ai premtoi investime në fusha të ndryshme gjatë qeverisjes së tij.

“Investimet kapitale në arsim do të rriten për 160 milionë në katër vitet e ardhshme, 120 milionë investime në shëndetësi, 1000 bursa për studentët, 8 mijë grante në vlerë 80 milionë euro për të rinjtë, çerdhe falas për fëmijë, për sportin dhe kulturën 140 milionë euro gjatë katër vitet e ardhshme.”