Albin Kurti vizitoi kampin me 440 familje të prekura nga tërmeti

Një delegacion i Lëvizjes Vetëvendosje i kryesuar nga Kryetari dhe Kryeministri i ardhshëm i Kosovës, Albin Kurti, kanë vizituar sot kampin inovativ në Prizren, ku po strehohen 440 familje të prekura nga tërmeti i 26 Nëntorit në Shqipëri.

Nga Vetëvendosje theksojnë se gjithçka po funksionon më së miri, nga kontrollet e mjekëve deri tek shpërndarja e ndihmave nga vullnetarët.

“Të gjitha nevojat elementare janë duke u plotësuar. Ndonëse çdo ditë ushqimi është duke u shtruar nga humanitarë zemërgjerë, në hapësirat e Kampit shpejt do të hapet edhe kuzhina ku do të gatuhet ushqim i freskët për refugjatët. Ish-hapësira e KFOR-it gjerman, sot Park Inovativ, edhe pse nuk mund ta ketë ngrohtësinë e shtëpisë, po ia del mbanë që mërzinë ta zbus. Në emër të organizatës sonë, i falënderojmë të gjithë për punën që po e bëjnë,” thekson Lëvizja Vetëvendosje përmes një komunikate duke garantuar:

“Shteti i Kosovës, Qeveria jonë, i tërë populli ynë kurrë nuk e lë vetëm Shqipërinë. Çfarë ndodhi nuk mund të zhbëhet, por jeta duhet të triumfojë. Këto ditë pikëllimin po e kthejmë në forcë. Ne jemi një komb dhe nuk jemi mysafir te njëri-tjetri, Kosova është shtëpia e juaj sepse kombi shqiptar është streha jonë”