Albin Kurti: Zgjedhjet e reja, aq shumë të nevojshme…

Kryetari i Lëvizjes Vetëvendosje, Albin Kurti, duke konstatuar se investimet në ekonomi zhvillimore kanë rënë, gjersa korrupsioni nëpër ndërmarrje publike është rritur, thekson se ndryshimi tashmë nuk është zgjedhje, por nevojë jetike, prandaj, zgjedhjet e reja janë aq shumë të nevojshme.

“Çdo i treti banor i Kosovës ka qasje të vështirë në kujdesin shëndetësor, kurse çdo i pesti nuk kërkon shërbime edhe në rast të sëmundjes, për shkaqe ekonomike. Vdekshmëria e foshnjeve në Kosovë është katërfish më e lartë sesa mesatarja në Bashkimin Evropian. Çdo i nënti fëmijë në Kosovë punon, ndërkaq vetëm çdo e teta grua ka një vend pune. Kosova i ka 34 ligje për mbrojtje sociale por pak zbatohen,” sjellë në vemendje Albin Kurti këto të dhëna përmes rrjetit social Facebook duke vlerësuar se shteti i Kosovës nuk vuan nga ligjet e këqija por nga pushteti i keq dhe institucionet e dobëta ndërsa pëfundon:

“Investimet në ekonomi zhvillimore kanë rënë, gjersa korrupsioni nëpër ndërmarrje publike është rritur. Institucionet e shtetit janë përgjigja për nevojat e shoqërisë dhe të drejtat e qytetarëve, e jo shans për interesat private dhe partiake. Ndryshimi tashmë nuk është zgjedhje, por nevojë jetike. Andaj, zgjedhjet e reja janë aq shumë të nevojshme.”