“Albini si Hitleri”, PZAP dënon LDK-në 20 mijë euro
Video e publikuar nga kandidatja për deputete e Lidhjes Demokratike të Kosovës, Xheneta Syka, bëri xhiron e botës kur ajo e krahasoi Kryeministrin e Kosovës, Albin Kurti, me nazistin Adolf Hitler, LDK u mburrë për ca ditë por sot kur Paneli Zgjedhor për Ankesa dhe Parashtresa, PZAP, e dënoi Lidhjen Demokratike të Kosovës me 20 mijë euro gjobë, LDK e mohon që ajo ka lidhje me këtë video në rrjetet sociale duke thënë se është bërë nga një profil tjetër dhe jo nga kandidatja për deputete.
Por, PZAP para se ta dënoj Lidhjen Demokratike të Kosovës për shkelje të “Kodit të Mirësjelljes” gjatë fushatës zgjedhore konstatoi se videoja ishte postuar në profilin e Sykës, por ishte fshirë më pas.
PZAP gjobiti dhe Aleancën për Ardhmërinë e Kosovës bazuar në ankese të Lëvizjes Vetëvendosje. Kështu AAK do të duhet të paguaj 12 mijë euro pasi kryetari i saj, Ramush Haradinaj, kishte bërë akuza të pabaza dhe të pavërtetuara kundrejt kryeministrit Kurti, ashtu si edhe kandidati për deputet i AAK-së, Ardian Gjini.
Paneli tha se Haradinaj dhe Gjini kanë nxitur “urrejtje” ndaj kryeministrit Kurti duke përdorur gjuhë denigruese dhe urrejtëse, pasi kishin thënë se “duhet ta heqim mashtruesin” dhe se “nuk duam më lojëra me sigurinë kombëtare pas shpinës së aleatëve tanë e në interes të Serbisë e Rusisë nga argati i tyre”
Paneli Zgjedhor për Ankesa dhe Parashtresa ka dënuar edhe Lëvizjen Vetëvendosje me 3.000 euro për shkak të gjuhës së përdorur nga Kryeministri, Albin Kurti, në tubimin e këtij subjekti politik në Pejë.
Sipas PZAP-së, ankesa është bërë nga Lidhja Demokratike e Kosovës, e cila e ka akuzuar Albin Kurtin se ka shkelur kodin e mirësjelljes. Por, PZAP e ka konsideruar pjesërisht të bazuar ankesën e LDK-së duke dënuar LVV-në me 3 mijë euro të cilat duhet t’i paguajë në një afat prej 15 ditësh.
