Aleatët me Bashën/ Sulmi i Opozitës, Shehi: Në të gjitha institucionet, hapësirën politike, shoqërore, mediatike…

Sulmi i opozitës do të jetë 360 gradë, në të gjitha institucionet, hapësirën politike, shoqërore, mediatike shqiptare. Kështu u shpreh kryetari i LZHK, Dashamir Shehi, pas takimit të Aleatëve me kryetarin e Partisë Demokratike, Lulzim Basha, duke saktësuar se të gjitha këto do të përcaktohen pas datës 16 mars kur pritet të zhvillohet protesta tjetër e madhe.

Me këtë rast Dashamir Shehi sqaroi se në takimin ku u diskutua rreth vijimësisë së betejës opozitare, u fol për dorëheqjen e zotit Rama, një qeveri tranzitore që të marrë përsipër dy-tre punë të rëndësishme, siç janë pastrimi i ambientit politik nga krimi dhe zgjedhje të reja e të lira.

“Pastaj, po qenë të zotë, të fitojnë prapë. Por ne gjykojmë se kjo është radha e opozitës. Këto që janë sot besoj se janë diskretituar edhe në rrafshin ndërkombëtar.”

I pyetur se po duket sikur ndërkombëtarët nuk e mbështesin aksionin e opozitës, kanë folur madje edhe për minim të demokracisë me djegien e mandateve, kryetari i LZHK u shprehë:

“Ne gjykojmë se ndërkombëtarët kanë marrë pozicionin e vet, tradicional, klasik, që këtu para demokracisë vihet stabiliteti. I mirëkuptojmë. Por gjykojmë se nga pozicioni i sotëm i demokratëve, ndryshe nga ai që ishte para tre muajve, ka një avancim shumë të madh. Kanë filluar ta kuptojnë edhe ata që sa të jetë zoti Rama do të ketë gjithnjë e më pak stabilitet, gjithnjë e më shumë drogë dhe krim të organizuar. Kështu që jemi edhe në rrugën për t’i bindur edhe ndërkombëtarët për këtë punë.”

Ndërkohë kryetari i Partisë Demokratike, Fatmir Mediu, pas takimit tha se u diskutua për vijimin e protestave dhe se çfarë do të bëjë opozita tashmë e në vijim ndërsa përfundoi:

“Opozita do të bëjë atë çfarë populli do, për ta kthyer vendin në binarët europianë.”

Dhe në fund, nëse Edi Rama nuk tërhiqet për krijimin e një qeverie tranzitore dhe zgjedhjet e parakohshme, njëri ndër aleatët kryesor të Lulzim Bashës u pyet nëse ekziston një skenar i opozitës për tërheqjen nga zgjedhjet lokale, Dashamir Shehi si gjithmonë i skatë dhe bashkëpunues me mediat, sqaroi: “Jo, nuk e kemi diskutuar këtë punë. Këto do të diskutohen gjithnjë pas datës 16 mars, pas demonstratës tjetër të madhe që do të organizohet. Deri atëherë rrimë me shpresë se njerëz të logjikshëm do të reflektojnë mbi momentin e rrezikshëm që po kalon Shqipëria.”