Aleksandar Vuçiç: Kemi forca më shumë se sa duhet për ndërhyrje në Kosovë
Forcat tona janë shumë më të forta në krahasim me nevojën për të parandaluar çdo lloj sulmi ose aksioni kundër shtetit të Serbisë, madje edhe kundër popullsisë sonë e cila nuk jeton brenda kufirit administrativ,” tha sot Presidenti i Serbisë, Aleksandar Vuçiç duke shtuar se ka forca të sigurisë në kufi me Kosovën më shumë se sa që duhen dhe mund të ndërhyjnë në çdo moment.
Nuk u kuptua se cili ishte qëllimi i Presidentit të Serbisë kur përdori këtë lloj fjalori luftarak ndërsa foli për sa “futje” të shqiptarëve në disa fshatra përgjatë brezit kufitar, edhe pse me këtë rast vetë e pranoi se fjala është për hajdut që vjedhin shtëpi.
“Siç thonë të rinjtë, kanë gjuajtur shtëpi, ishin në dijeni se ishin bosh dhe janë futur për të vjedhur dhe kjo është e gjitha,” tha Vuçiç duke shtuar se duhet angazhim që të rritet numri i popullsisë serbe në ato zona sepse atje jetojnë vetëm shqiptarë.
“Perëndimi e ka xhan”
Me këtë rast ai sërish foli për Ushtrinë e Kosovës, duke shtuar se për Beogradin është shumë i rrezikshëm fakti që Prishtina po bënë gjithçka që është e mundur për të bindur serbët që të futen në Ushtrinë e Kosovës.
“Serbisë nuk i duhet konflikti serbo-serb,” tha ai duke vlerësuar se ky është problemi më i madh për Serbinë, dhe, ju kthye retorikës së sëmurë serbe siç e përdori kohë më parë me Kroacinë:
“Janë futur në Partesh dhe Pasjan me aktivistët e tyre dhe kanë ofruar pallate e qytete vetëm që serbët të futen në Ushtrinë e Kosovë. Pyes të gjithë serbët që mendojnë për këtë gjë, pse ju thërrasin, çfarë mendoni, cili është kuptimi i Ushtrisë së Kosovës, vetëm që një ditë ose kur do të kenë mundësi, të sulmojnë serbët dhe Ushtrinë e Serbisë,” tha Vuçiç, i cili luftën dhe gjakderdhjen e ka edhe bukë edhe gjellë duke iu rikthyer historisë dhe së fundi shqetësimit që ka kur edhe kur fle gjumë:
“Kjo nuk na duhet, nuk na duhet konflikti serbo-serb. Po a do të përdorin mënyra të ndryshme të presionit për dëbimin e popullsisë tona? Këtë e bëjnë në 50, 60 vjetët e fundit. Dhe kishit mundësi ta shikonit në Munhen, ata janë mësuar ta zbatojnë atë lloj rrëfimi ku vazhdimisht janë viktima,” tha Presidenti i Serbisë, i cili vrasjen e 12 mijë shqiptarëve në luftën e Kosovës, për të cilën u fol në Konferencën e Sigurisë e konsideron sajesë shqiptare, ndërsa vazhdon dhe shqetësohet pse sot vazhdojnë të jetojnë më shumë shqiptarë se sa më parë ndërkohë që numri i serbëve është ulur dukshëm. “Kur shikoni gjendjen reale, shihet që serbët janë ata që në masë të madhe janë dëbuar, e jo shqiptarët, por pak kush dëshiron ti dëgjoj këto e në veçanti Perëndimi. Aty nuk është se ka dashuri, por interesi i tyre është që Kosova të jetë shtet i pavarur, ata Kosovën e kanë xhan, ajo është toka e tyre,” tha Presidenti i Serbisë, Aleksandar Vuçiç duke vazhduar me një mori të pavërtetash për realitetin serbo-shqiptar ndërsa paralajmëroi sulmin, siç tha ai, mbi “Brezovicë” ku e pranoi publikisht se shteti i Serbisë investon shumë, e në Shtërpce ndihmohen serbët përmes “Telekomit të Serbisë”, për të ruajtur dhe për të mbrojtur, siç tha ai, pronën serbe.
