Aleksandar Vulin emërohet drejtor i Agjencisë serbe të Zbulimit, BIA

Ish-ministri i Brendshëm i Serbisë, Aleksandar Vulin, sot u emërua drejtor i Agjencisë serbe të Zbulimit, BIA.

Lajmin për këtë emërim e raportuan disa media serbe duke përfshirë këtu dhe televizionin shtetëror, RTS, i cili tha se vendimi u mor nga Qevria e Serbisë.

Lidhur me këtë emërim, RFE dërgoi pyetje në Qeverinë e Serbisë por nuk mori përgjigje.

Para Aleksandar Vulinit, në këtë post ishte Bratisllav Gashiç, tani ministër i Punëve të Brendshme të Serbisë.

BIA është një shërbim civil i sigurisë kombëtare të Republikës së Serbisë.

Ajo është përgjegjëse për mbrojtjen e sigurisë së këtij vendi dhe, ndër të tjera, për zbulimin dhe parandalimin e aktiviteteve që, siç thuhet, synojnë cenimin ose rrëzimin e rendit të vendosur me Kushtetutën e Republikës së Serbisë.

Ndryshe, Aleksandar Vulin, më herët, ka qenë edhe drejtor i Zyrës për Kosovën në Qeverinë e Serbisë.