Aleksandar Vulin: Kufiri me shqiptarët, sa më shpejtë!

Ministri i Mbrojtjes i Serbisë, Aleksandar Vulin tha se kur të përcaktohet kufiri, atëherë do të kemi mundësi që ta mbrojmë. Në një intervistë për të përditshmen serbe “Veçernje Nobosti” ai thotë se “Shqipëria e Madhe” është këtu, më mirë të mos e presim në Serbinë Qendrore.

Ai tha se angazhohet që sa më shpejt të vendoset kufiri me shqiptarët, nuk e përcaktoi se ku është por tha se ka ekzistuar edhe më herët dhe vazhdon të ekzistoj, me vendkalime kufitare ndërmjet dy vendeve e me roje ushtarake policore po ashtu në të dy anët e kufirit.

Duke paralajmëruar edhe rrezikun e krijimit të “Shqipërisë së Madhe” Ministri i Mbrojtjes i Serbisë mendon se çështja e vetme është se sa pjesë të shteteve do të përfshihen në këtë Shqipëri të Madhe.

“Shqipëria e Madhe tashmë është krijuar. Çështje është se sa pjesë të shteteve të tjera do të përfshijë. Me hyrjen e Maqedonisë së Veriut në NATO, të gjithë shqiptarët, me përjashtim të dy komunave në Serbi, do të jetojnë në një zonë unike të sigurisë dhe në hapësirën politike në kuadër të NATO-s. E jeta e të gjithë shqiptarëve drejtohet nga Tirana,” thaai .

Duke folur për ndarjen ose kufizimin, Vulin thotë se në rast të kësaj zgjidhjeje, ajo duhet konfirmuar me referendum.

“Disa fuqi të mëdha do të përkrahnin ndarjen, disa jo, ne duhet të marrim pjesë në këtë ndeshje.”

Lidhur me konstatimin se në rast të ndarjes, shumë serbë do të mbeteshin në Kosovën e pavarur, Vulin thotë:

”Unë s’e kam vizatuar kufirin , unë vetëm dua të ndahem nga shqiptarët e Kosovës. Mendoj se ndarja është zgjidhja më e mirë. Nëse ndahemi nga shqiptarët, pas marrëveshjes, do të kishim më shumë mundësi t’i ndihmonim serbët që jetojnë në hapësirën me shumicë shqiptare se sa që kemi tash mundësi tash t’i ndihmojmë ata në hapësirat me shumicë serbe në Kosovë.” tha Aleksandar Vulin, sipas të cilit, konflikti me shqiptarët e Kosovës nuk është dhe nuk mund të jetë konflikt ngrirë.

“Sa më shpejt që largohemi nga shqiptarët, aq më shpejt do të fillojmë së jetuari. Nëse nuk duam, atëherë me fat Kosova e tërësishme e me pavarësi.”