Alternativa e PD, Basha sot prezanton platformën për çlirim e ekonomisë nga monopolet dhe anulimin e koncesioneve

Në një tryezë me ekspertë të fushës së ekonomisë dhe përfaqësues të botës së biznesit, sot opozita do të paraqesë platformën e saj politike për “çlirim të ekonomisë nga monopolet”. Kryetari i Partisë Demokratike, Lulzim Basha, pritet të prezantojë sot edhe alternativën e PD-së për të ndalur dhënien e koncesioneve abuzive përmes ndryshimit të Ligjit Antimafi.

Burime nga PD sqarojnë se në thelb të ndryshimeve të Ligjit Antimafia që opozita do të paraqesë, do të jetë anulimi i çdo koncesioni korruptiv.

Grupi i punës, i drejtuar nga nënkryetarja e Komisionit të Ekonomisë, Jorida Tabaku, në bashkëpunim  me deputetët tjerë opozitarë kanë hartuar sugjerimet konkrete për koncesionet, PPP-të dhe prokurimet publike, të cilat, sipas PD, u kalojnë të gjitha klientëve të qeverisë.

Kryetari i PD, Lulzim Basha ka premtuar prezantimin e një platforme për një ekonomi të çliruar nga monopolet, nga oligarkët dhe nga korrupsioni qeveritar, në funksion të mirëqenies së qytetarëve. Ndërkohë e ka cilësuar emergjencë kombëtare amendimin e Ligjit Antimafia për të vepruar menjëherë mbi pasuritë e çdo individi që merr pjesë në koncesionet dhe tendera publikë dhe që nuk arrin të justifikojë të ardhurat e tij.

Ndryshe, nga sot Partia Demokratike do të nisë një konsultim mbarëkombëtar me qytetarët për të deklaruar edhe qëndrimin që do të mbajë përballë gjendjes që po kalon vendi.