Ambasadori amerikan viziton kampin Notting Hill në veri të Kosovës

Ambasadori i Shteteve të Bashkuara në Prishtinë, Jeffrey Hovenier, është takuar sot me ushtarët amerikanë të dislokuar në Komandën Rajonale në Lindje të misionit të KFOR-it, të udhëhequr nga NATO, në kampin Notting Hill.

Jeff Hovenier ishte i shoqëruar nga Komandanti Jason Baker, i cili e informoi për kontributin e SHBA-së në aktivitetet e përditshme të KFOR-it në mbështetje të sigurisë së qëndrueshme në mbarë Kosovën.

“KFOR-i vazhdon të zbatojë mandatin e tij të OKB-së – bazuar në Rezolutën e Këshillit të Sigurimit të OKB-së për të siguruar një mjedis të qetë dhe të sigurt për të gjithë njerëzit që jetojnë në Kosovë dhe lirinë e lëvizjes, në çdo kohë dhe në mënyrë të paanshme,” thuhet në njoftimin e KFOR duke përfunduar:

KFOR-i është reaguesi i tretë i sigurisë, pas Policisë së Kosovës dhe misionit të BE-së për Sundimin e Ligjit, EULEX, reaguesi i parë dhe i dytë, respektivisht, me të cilët punojmë në koordinim të ngushtë.”