“Serbia më afër NATO-s se Kosova”, Osmani: Ofendim për çdo shtet demokratik dhe viktimat e Milosheviçit!
Ofendim për çdo shtet demokratik dhe viktimat e Slobodan Milosheviçit, e konsideroj sot Presidentja e Kosovës, Vjosa Osmani, konstatimin e Ambasadorit të SHBA në Beograd, Christopher Hill, se sot Serbia është më afër NATO-s se Kosova. Duke folur për media pas Konferencës “Java e Gruas”, Vjosa Osmani shtoi se i vetmi shtet që është më larg NATO-s se Serbia, është Rusia e Putinit.
“Është shtet që ka kryer gjenocid, është shtet që ka kryer krime kundër njerëzimit. Është shtet që ka kryer krime lufte e akoma fle mbi varreza masive. Kështu që më lejoni të them troç, kushdo që e konsideron Serbinë që është shtet që është afër NATO-s nuk e ofendon vetëm çdo shtet demokratik që po bën hapa konkret drejt anëtarësimit në NATO, por njëkohësisht i ofendon edhe viktimat e Serbisë së Millosheviçit, e cila është e njëjtë sot siç ka qenë edhe para disa dekadave”
Dhe jo vetëm kaq!
“Është i vetmi shtet i Ballkanit Perëndimor që vazhdimisht ka deklaruar se nuk do të anëtarësohet në NATO dhe se është kundër NATO-s. E treta Serbia është shtet që para pak muajsh ka kryer akt agresioni kundër Republikës së Kosovës, që vazhdimisht tenton të shkatërrojë Bosnjë-Hercegovinë përbrenda, e njëjtën e bën edhe me Malin e Zi. Kjo nënkupton se ky është një shtet njësoj si Rusia, që shkel parimet e vlerat e fqinjësisë së mirë, por në të njëjtën kohë ndërmerr veprime konkrete të dhunshme, duke i konsideruar fqinjtë përreth si shtete të përkohshme e jo si shtetet të përhershme siç jemi ne,” tha Presidentja e Kosovës, Vjosa Osmani duke e bërë të qartë se ka vetëm një shtet që është më larg NATO-s se Serbia, Rusia e Putinit.
“Ekziston vetëm një shtet që është më larg NATO-s se Serbia, e ai shtet është Rusia e Putinit. Një shtet si Serbia, që vazhdimisht ka shkelur vlerat kryesore mbi të cilat qëndron NATO, mbrojtjen nga forcat autoritare, mbrojtjen nga shtetet që shkelin rregullat bazike të së drejtës ndërkombëtare, lëre më që është larg NATO-s, por as që mund të ëndërrojë një ditë të jetë pjesë e NATO-s.”
Ndryshe, në prag të 25 vjetorit të bombardimit të Serbisë nga Aleanca Veriatlantike, Ambasadori i SHBA në Beograd, Christopher Hill, tha për televizionin publik serb, RTS, se Serbia është shumë më afër NATO-s se Kosova.
“Në fakt, nëse e shikoni se kush është partner i NATO-s, Serbia është shumë më afër NATO-s se Kosova. Për momentin, po. Kjo është shumë e saktë. Ne, po punojmë me ushtrinë serbe çdo ditë. Kemi pas stërvitje, kemi pas aftësime, kemi pasur disa aktivitete me ushtrinë serbe.”
