Ambasadori i BE-së në Tiranë: Procesi i anëtarësimit nuk do të thotë vetëm miratim legjislacioni!
Procesi i anëtarësimit nuk do të thotë vetëm miratim legjislacioni, por kërkon shndërrim të shoqërisë në të gjitha aspektet e saj, tha sot Ambasadori i Bashkimit Europian në Shqipëri, Silvio Gonzato, në Konferencën Rajonale “Përshpejtimi i Reformave të Kujdesit për Fëmijët drejt Anëtarësimit në BE” ndërsa sqaroi se sipas negociatave për anëtarësim, të drejtat e fëmijëve janë pjesë e grup kapitullit themelor.
“Një nga objektivat që duhet të arrihet deri në 2030 në BE është ulja e numrit të personave që janë në rrezik varfëria apo nga përjashtimi social në të paktën 15 milionë dhe shifra për fëmijët është 5milionë. Ne e shikojmë garanci për fëmijët si një program kyç për të ofruar mbështetje të rinjve.
Procesi i anëtarësimit nuk do të thotë vetëm miratim legjislacioni, por kërkon shndërrim të shoqërisë në të gjitha aspektet e saj. Sipas negociatave për anëtarësim, të drejtat e fëmijëve janë pjesë e grup kapitullit themelor, ndërsa legjislacioni për arsimi dhe politikën sociale mbulohet nga grup kapitullit tre që shpresojmë të hapet së shpejti,” tha Ambasadori i BE në Shqipëri, Silvio Gonzato, duke përfunduar:
“Vendet kandidate pritet që të krijojnë kuadrin e duhur për të krijuar mjedisin që lejon ecjen përpara të rinisë, duke ofruar studentëve aftësitë që i duhen edhe nga tregu i punës. Të krijohen më shumë mundësi dhe më shumë mundësi të barabarta për punësim me dinjitet.
BE është këtu për të shoqëruar të gjithë vendet kandidate nëpërmjet planit të rritjes.
Mbështetja vjen edhe në mbështetje financiare për zbatimin e reformave. Konferenca e sotme një tjetër hap i rëndësishëm.”
Ndryshe, në Konferencën Rajonale “Përshpejtimi i Reformave të Kujdesit për Fëmijët drejt Anëtarësimit në Bashkimin Evropian” që po zhvillohet në Tiranë marrin pjesë përfaqësues nga vendet e Ballkanit Perëndimor – Shqipëria, Kosova, Maqedonia e Veriut dhe Mali i Zi, si një platformë e rëndësishme për forcimin e politikave sociale dhe mbrojtjes së fëmijëve në rajon.
