Ambasadori i ri i SHBA: Unë jam shumë i gëzuar me qenë këtu në Kosovë!
Presidentja e Kosovës, Vjosa Osmani, ka pranuar sot letrat kredenciale nga Ambasadori i ri i Shteteve të Bashkuara në Prishtinë, Jeff Hovenier, i cili është emëruar në këtë post nga presidenti Joe Biden në korrik 2021.
“Kosova sot është shumë ndryshe nga Kosova të cilën e kujton ambasadori sepse ka ecur përpara, por një gjë është e njëjtë, marrëdhënia me Shtetet e Bashkuara të Amerikës. Jemi të bekuar të kemi ShBA-të pranë nesh me çdo hap të rrugëtimit tonë. Në këtë kapitull të ri të bashkëpunimit shpresoj të forcojmë edhe me tej marrëdhëniet tona. Besoj fuqishëm se pavarësisht sa i madh apo i vogël mund të jetë një shtet ne te gjithë mund të japim kontribut për paqen në rajon dhe botë,” tha Vjosa Osmani duke i garantuar ambasadorit të ri të SHBA se nuk do të gjejë asnjëherë aleat më të përkushtuar dhe të besuar.
Ndërsa Ambasadori Hovenier e ka nisur fjalën e tij në gjuhën shqipe:
“Unë jam shumë i gëzuar me qenë këtu në Kosovë!”
“Më vjen mirë për rolin që SHBA ka luajtur në mbështetje të Kosovës. Ka ende shume punë për te bërë siç ka në çdo vend, jam krenar dhe i përulur, i ngazëllyer, prej mundësisë që të marr pjesë në këtë proces të punojmë bashkë si përfaqësues i presidentit Biden këtu. SHBA janë partnere e qëndrueshme e Kosovës,” tha Ambasadori i ri i SHBA në Prishtinë, Jeff Hovenier, duke garantuar para Presidentes së Kosovës, Vjosa Osmani, se do të punojnë me Ju, qeverinë, popullin për të avancuar prioritetet tona.
Ndryshe, në seancën dëgjimore para Komitetit për Marrëdhënie me Jashtë pranë Senatit, Jeff Hovenier tha se nëse konfirmohet në postin e Ambasadorit, prioritet i tijë do të jetë vazhdimi i mbështetjes amerikane për një Kosovë sovrane e demokratike si dhe do ta inkurajojë Kosovën për konstruktivitet dhe fleksibilitet në bisedimet për normalizimin e marrëdhënieve me Serbinë.
