Ambasadori i SHBA në Çeki, mbështetje e palëkundur për Kosovën e pavarur

Ambasadori i SHBA në Çeki, Stephen B.King, sot në takim me Ambasadorin e Kosovës në Pragë, Arbër Vllahiu, ka shprehur mbështetjen e palëkundur të Shteteve të Bashkuara për Kosovën e pavarur.

“Ishte një nder të takohesha me ambasadorin Arbër Vllahiu këtë mëngjes dhe të riafirmojë qëndrimin e palëkundur të SHBA-së për një Republikë sovrane, të pavarur të Kosovës, e integruar tërësisht në bashkësinë ndërkombëtare,” thekson Ambasadori King përmes një postimi në rrjetin social Twitter, pas takimit me Ambasadorin Vllahiu dhe një ditë pas deklaratës së Presidentit të Çekisë, Millosh Zeman në Beograd, se brenda një muaji do ta shqyrtojnë mundësinë e tërheqjes së njohjes për pavarësinë e Kosovës.

Ndërkohë Kryeministri i dorëhequr i Kosovës, Ramush Haradinaj, ka konfirmuar mospjesëmarrjen në Samitin e Vishegradit duke dhënë si arsye pragzgjedhjet në Kosovë. Ndërsa dje, mediat çeke kanë raportuar se anulimi i Haradinajt erdhi pas deklaratave të Presidentit çek, Milosh Zeman.