Ambasadori Kosnett: Administrata Biden e ka pranuar tërësisht Marrëveshjen e Washingtonit
Administrata e Bidenit e ka pranuar Marrëveshjen e Washingtonit tërësisht, tha Ambasadori i Shteteve të Bashkuara në Kosovë, Philip Kosnett, duke saktësuar se SHBA është e përkushtuar të mbështes procesin e dialogut të udhëhequr nga BE.
“Administrata e Bidenit ka përqafuar marrëveshjen e Washingtonit tërësisht. Por kjo nuk do të thotë që kur Qeveria e Kosovës dhe ajo e Serbisë takohen nën patronazhin e BE-së, për të vazhduar përpara, ajo është skica e vetme për të biseduar. Ke elemente politikë që nuk janë diskutuar në atë marrëveshje,” tha Ambasadori Kosnett për RTV 21 ndërsa për dokumentet e fundit që po qarkullojnë në media për ndryshimin e kufijve në Ballkanin Perëndimor shtoi:
“Nuk e di kush i shkruan këto dokumente jozyrtare, por kushdo që po i shkruan me siguri gëzohet nga reagimi i tepruar.”
Përkundër “non papers” që shfaqen çdo ditë në mediat nga më të ndryshmet, Ambasadori i SHBA në Kosovë, Philip Kosnett, e tha qartë se as SHBA e as partnerët evropianë nuk kanë fare interesim për të nxitur apo shtyrë çfarëdo shkëmbimi territori në Kosovës te palët.
