Ambasadorja Yuri Kim në KED: Gjykata Kushtetuese, funksionale deri më 31 Dhjetor!

Ambasadorja e SHBA në Tiranë, Yuri Kim, pas takimit me Ambasadorin e BE, Luigi Soreca në KED, me Kryetaren në detyrë, Vitore Tusha, tha se me funksionalizimin e Gjykatës Kushtetuese deri më 31 Dhjetor, Presidenti Meta, Kryetari i Parlamentit Ruçi dhe Kryetarja e KED Tusha, do të meritojnë lëvdata për ndërmarrjen e veprimeve në përgjigje të kërkesës së popullit shqiptar për Reformën në Drejtësi.

“Luigi Soreca dhe unë u takuam sot me Kryetaren e KED Tusha, për të rikonfirmuar afatin kohor për emërimin e kandidatëve të kualifikuar në Gjykatën Kushtetuese. Takimi i nesërm i KED – i cili, si zakonisht, përfshin vëzhgues nga Parlamenti & Presidenca duhet ta çojë procesin përpara, në mënyrë që Shqipëria të ketë një Gjykatë Kushtetuese funksionale deri më 31 dhjetor,” shprehet pas takimit në KED, Ambasadorja Yuri Kim përmes rrjetit social Twitter duke përfunduar:

“Kur kjo të ndodhë, udhëheqësit – sidomos Presidenti Meta, Kryetari i Parlamentit Ruçi & Kryetarja e KED Tusha – do të meritojnë lëvdata për ndërmarrjen e veprimeve urgjente në përputhje me opinionin e Komisionit të Venecias dhe në përgjigje të kërkesës së popullit shqiptar për Reformën në Drejtësi.”