AmCham me tatimet, Binaj: Pas 30 ditësh informim, në janar nis kontrolli për sektorin e ndërtimit

Në takim me Anëtarët e Dhomës Amerikane të Tregtisë, AmCham, Drejtori i Përgjithshëm i administratës tatimore Ilir Binaj, informoi bizneset për prioritet e administratës tatimore për 2026 që nga zbatimi së re fiskale, rimbursimi i TVSH-së për individët, rimbursimet e TVSH-së për fermerët, formalizimi i ekonomisë me fokus të veçantë te pagat,  jo duke rritur numrin e kontrolleve, por duke rritur kompetencën dhe profesionalizmin.

Ilir Binaj gjithashtu nënvizoi se industritë si: ndërtimi, turizmi dhe siguria ushqimore do të mbeten në qendër të veprimtarisë të administratës tatimore.

“Edhe pse ndonjëherë roli i Dhomës së Tregtisë dhe anëtarëve të saj mund të duket i ndryshëm nga yni – ne kemi fokus mbledhjen e të ardhurave dhe përmbushjen, ju keni fokus rritjen e biznesit dhe krijimin e mundësive – besoj se objektivi ynë përfundimtar është i njëjtë: një ekonomi e fortë dhe e begatë. Në shumë raste, marrëdhënia mes administratës tatimore dhe bizneseve mund të jetë përballje dhe e vështirë, ndaj ne jemi këtu për të ndërtuar ura mes nesh.

E di që është e vështirë t’i bësh tatimpaguesit t’i pëlqejnë taksat, por duhet të kujtojmë se taksat janë çmimi që paguajmë për qytetërimin. Ne, si administratë tatimore, jemi në proces rishikimi të brendshëm për atë që kemi bërë gjatë 12 muajve të fundit dhe po përgatisim planet e operacioneve për vitin e ardhshëm, ndaj kontributi juaj është shumë i vlefshëm për ne.

Prioritetet tona kryesore si administratë tatimore për vitin e ardhshëm janë: zbatimi i paketës së re fiskale, paqja fiskale, rimbursimi i TVSH-së për individët, rimbursimet e TVSH-së për fermerët, formalizimi i ekonomisë me fokus të veçantë te pagat,  jo duke rritur numrin e kontrolleve, por duke rritur kompetencën dhe profesionalizmin; duke kryer më pak kontrolle, por më të thelluara dhe më të plota. Industri si ndërtimi, turizmi dhe siguria ushqimore do të mbeten në qendër të veprimtarisë sonë.

Sa i përket harmonizimit me BE-në në kuadër të Kapitullit 16: administrata tatimore po punon me afate shumë të ngushta për harmonizimin dhe zbatimin e 50 direktivave të lidhura me administrimin tatimor, të asistuar nga Administrata Tatimore Suedeze.

Dua të them disa fjalë për paqen fiskale. Në të kaluarën ka pasur ankesa nga bizneset për frekuencën e kontrolleve tatimore, por nga ana tjetër, administrata tatimore ka detyrimin të mbledhë të ardhurat, dhe duke marrë parasysh nivelin e informalitetit, kjo nuk mund të bëhet pa masa të detyruara. Kështu, paqja fiskale është pika e mesit: administrata tatimore bie dakord të mos kryejë kontrolle për tatimin mbi të ardhurat, me premtimin e pagesave më të larta”.

Zoti Binaj gjithashtu u shpreh se në muajin janar do të nisë kontrollin në sektorin e ndërtimit, ku qasja do të jetë e njëjtë me një fushatë paralajmëruese 30 ditë më parë.

“Në lidhje me përpjekjet tona të harmonizimit, do të nisojmë në janar me sektorin e ndërtimit. Qasja jonë do të jetë e ngjashme me atë që kemi pasur më parë: do të fillojmë me një fazë informimi 30-ditore, duke sqaruar çfarë kërkojmë. Gjatë kësaj faze do të dërgojmë një numër të madh njoftimesh për të informuar dhe edukuar tatimpaguesit e identifikuar nga analiza e riskut. Për bizneset që nuk përgjigjen ndaj thirrjeve tona, do të nisin kontrollet, me fokus tek aktiviteti aktual si çmimet e shitjes, deklarimet e pagave, etj.

Si administratë tatimore, përpiqemi të mos e shohim veten si zbatues të detyrimit, por si edukatorë, lehtësues dhe avokatë të një sistemi tatimor të drejtë. Çdo ndërveprim që kemi me tatimpaguesit mund të formësojë perceptimin e tyre për misionin tonë, ndaj është e rëndësishme të kuptojmë dhe të mësojmë nga njëri-tjetri se si ta bëjmë përvojën tuaj tatimore sa më të lehtë dhe mbështetëse, si të ruajmë standardet më të larta etike në veprimtarinë tonë, si të vlerësojmë dhe rafinojmë rregullisht praktikat tona për t’i përshtatur me modelet më të mira dhe prirjet e reja. Dhe këtu, komunikimi me dhomat e tregtisë mund të ndihmojë shumë.

Në thelb, administrata jonë tatimore përpiqet të balancojë këto objektiva:

Barazinë – barra tatimore duhet të ndahet në mënyrë të drejtë mes qytetarëve;

Efikasitetin – minimizimin e ndikimit të tatimeve te individët dhe bizneset;

Thjeshtësinë – ta bëjmë sistemin të kuptueshëm dhe të pranueshëm për të gjithë tatimpaguesit;

Përmbushjen – nxitjen e përmbushjes vullnetare, duke ruajtur njëkohësisht masa të forta zbatimi.

Besoj se administrata tatimore mbetet një nga strukturat më efektive të qeverisë shqiptare, përgjegjëse për mbledhjen e 4.5 miliardë lekëve për vitin 2025 dhe shërbimin ndaj rreth 140.000 tatimpaguesve. Sigurisht ka shumë procese dhe shërbime që mund të përmirësohen, dhe ne punojmë çdo ditë për t’i adresuar ato. Por duhet të keni parasysh se kapacitetet tona njerëzore janë të kufizuara në 1.400 punonjës”./Monitor/