Amerika dhe Ukraina firmosin Marrëveshje që sjellë paqen
Departamenti i Financave i Shteteve të Bashkuara njoftoi se Amerika dhe Ukraina firmosën një marrëveshje për krijimin e një Fondi Investimi për Rindërtim, ndërsa Bloomberg News raporton se të dy vendet firmosën gjithashtu një marrëveshje për aksesin në burimet natyrore të Ukrainës.
Marrëveshja për aksesin në burimet natyrore të Ukrainës do t’i japë SHBA-së akses preferencial në projekte të reja investimi për të zhvilluar burimet natyrore të Ukrainës, duke përfshirë aluminin, grafitin, naftën dhe gazin natyror, raporton Bloomberg.
Edhe pse detajet specifike zyrtare nuk dihen ende, Ministria deklaron se marrëveshja krijon një Fond Investimi për Rindërtim SHBA-Ukrainë.
Sipas deklaratës, firmosja e marrëveshjes i dërgon një mesazh Rusisë se administrata e Donald Trump është e përkushtuar ndaj një procesi paqeje të bazuar në një Ukrainë të lirë, sovrane dhe të begatë.
Shtetet e Bashkuara dhe qeveria ukrainase kanë njoftuar se do të fillojnë shpejt zbatimin e këtij Fondi në dobi të qytetarëve të të dy vendeve.
Sekretari i Thesarit të SHBA-së: Firmosja, falë përpjekjeve të palodhura të Trumpit
“Falë përpjekjeve të palodhura të Presidentit Trump për të siguruar paqe të qëndrueshme, me kënaqësi mund të shpall firmosjen e kësaj marrëveshjeje historike ekonomike midis Shteteve të Bashkuara dhe Ukrainës që krijon Fondin e Investimeve për Rindërtim SHBA-Ukrainë,” tha Sekretari i Thesarit i SHBA-së, Scott Bessent.
“Siç e ka thënë presidenti, Shtetet e Bashkuara janë të përkushtuara për të lehtësuar përfundimin e kësaj lufte mizore dhe të pakuptimtë. Me këtë marrëveshje, ne po i dërgojmë një mesazh të qartë Rusisë se administrata e Presidentit Trump është e përkushtuar ndaj një procesi paqeje të bazuar në një Ukrainë të lirë, sovrane dhe të begatë, dhe për një kohë të gjatë.”
Presidenti Trump e hartoi këtë partneritet midis popullit amerikan dhe atij ukrainas për të demonstruar një angazhim të ndërsjellë për paqe dhe progres të qëndrueshëm në Ukrainë. “Dhe më lejoni të jem i qartë – asnjë vend apo individ që ka financuar ose furnizuar makinën ruse të luftës nuk do të përfitojë nga rindërtimi i Ukrainës,” tha Bessent.
Ministrja ukrainase: Kjo do të tërheqë investime globale në vendin tonë
“Në emër të qeverisë ukrainase, firmosa një marrëveshje për bashkëpunimin amerikano-ukrainas. Së bashku me Amerikën, po krijojmë një fond që do të tërheqë investime globale në vendin tonë,” tha Ministrja e Ekonomisë e Ukrainës, Yulia Sviridenko, përmes rrjetit social X.
On behalf of the Government of Ukraine, I signed the Agreement on the Establishment of a United States–Ukraine Reconstruction Investment Fund.
— Yulia Svyrydenko (@Svyrydenko_Y) April 30, 2025
Together with the United States, we are creating the Fund that will attract global investment into our country. pic.twitter.com/8ryyAMqW83
Trump: Paratë tona janë të sigurta
Trump ishte shprehur më parë në mbledhjen e kabinetit të administratës së tij se marrëveshja ishte e mirë për të dyja palët.
“Kemi një marrëveshje me të cilën paratë tona janë të sigurta, që na lejon të fillojmë shpimet dhe të bëjmë atë që duhet të bëjmë,” tha dje Presidenti i SHBA-së, Donald Trump, gjatë një takimi të kabinetit në Shtëpinë e Bardhë. “Është mirë edhe për ta, sepse prania amerikane në terren do të dekurajojë shumë aktorë keqdashës nga vendi, ose të paktën nga zona ku po bëjmë shpime,” shtoi Trump.
Marrëveshja ishte menduar të firmosej në muajin shkurt, por për shkak të një acarimi në Zyrën Ovale në mes të Presidentit Trump, Zv/Presidentit J. D. Vance me Presidentin e Ukrainës, Zelenskyy u largua pa e firmosur.
Reagimi i Rusisë
Moska ende nuk ka komentuar zyrtarisht për marrëveshjen. Por më herët, Presidenti rus Vladimir Putin i tha televizionit shtetëror rus se ishte gati t’u “ofronte” partnerëve amerikanë bashkëpunim në projektet e minierave, përfshirë shfrytëzimin në të ashtuquajturat “territore të reja” – duke aluduar në pjesë të Ukrainës lindore që Rusia i ka pushtuar që nga fillimi i pushtimit të saj të plotë tre vjet më parë.
Putin tha më pas se një marrëveshje e mundshme midis SHBA-së dhe Ukrainës mbi mineralet e rralla “nuk më shqetëson” sepse, siç deklaroi ai, Rusia “padyshim ka, dhe dua ta theksoj këtë, shumë më tepër burime të tilla sesa Ukraina”.
Ai shtoi se Rusia është e gatshme të tërheqë partnerë të huaj për të shfrytëzuar “territoret tona historike që i janë rikthyer Federatës Ruse”.
