Amerika voton, republikanët pranë fitores për Kongres

Qytetarët në SHBA po votojnë për zgjedhjen e 435 anëtarëve të Dhomës së Përfaqësuesve, 35 nga 100 anëtarët e Senatit, dhe 36 nga 50 guvernatorë sa janë në Amerikë, si dhe zyrtarët tjerë në nivel të shteteve federale.

Gara kryesore në këto zgjedhje është për kontrollin e Kongresit, që aktualisht e kanë demokratët. Pritet që republikanët të marrin Dhomën e Përfaqësuesve, deri sa gara për Senat, ku aktualisht të dy partitë i kanë nga 50 ulëse, është e ngushtë. Zyrtarisht, përbërja e re e Kongresit merr detyrën në muajin janar të vitit 2023.

Qendrat e votimit janë hapur fillimisht në bregun lindor të SHBA, dhe brenda pesë orëve në të gjitha qendrat e votimit në Amerikë, aq orë sa janë Hawaii nga bregu lindor.

Shtetet e Bashkuara kanë një sistem të decentralizuar, që do të thotë se në shtetet federale votohet në mënyra të ndryshme: diku mund të votohet me postë, diku duhet fizikisht, e disa shtete lejojnë të variantet. Gjithashtu, mund të votohej edhe para ditës së zgjedhjeve.

Më shumë se 40 milionë amerikanë tashmë kanë votuar në qendrën e votimit ose me postë!

Mënyrat e ndryshme dhe shpejtësia e votimit tregojnë se jo të gjitha rezultatet do të dihen në mbrëmjen zgjedhore. Disa shtete, si Pennsylvania ose Wiskonsin, nuk lejojnë që votat e arritura me postë të numërohen para ditës zgjedhore, deri sa shtetet tjera japin një afat që këto vota edhe mund të mbërrijnë edhe pas ditës zgjedhore.

Për shkak të këtij lloji sistemi të votimit, në disa shtete federale numërimi i votave do të zgjas edhe për disa ditë ose javë pas ditës zgjedhore.

Në Shtetet e Bashkuara nuk ekziston një agjenci federale e cila shpall fituesin e zgjedhjeve, por çdo shtet e bënë për veten e vetë. Agjencia e lajmeve Associated Press, në bazë të kampionit të saj prezantues, gjtihashtu shpall rezultatet e zgjedhjeve.

Nëse republikanë marrin Kongresin?

Gara kryesore në këto zgjedhje është kontrolli ndaj Kongresit, të cilin aktualisht e kanë demokratët, dhe pritet ta marrin republikanët. Sondazhet thonë se demokratët mund ta humbin Dhomën e Përfaqësuesve të cilin e morën gjatë mandatit të Preidentit Donald Tramp, më 2018. Mirëpo, për shkak të shumicës së brishtë, republikanëve u duhen vetëm gjashtë mandate më shumë se sa që kanë aktualisht për të marrë kontrollin mbi Kongresin.

Kjo do të thotë se agjenda e presidentit demokrat, Joe Biden, do të bllokohet, përkatësisht nuk do të ketë mbështetjen për miratimin e ligjeve, siç e gëzonte deri më sot. Ndërkohë Biden e ka të drejtën e vetos në vendimet e Kongresit.

Gara për Senat, ku të dy partitë kanë nga 50 ulëse, demokratët e kanë një votë më shumë, të Zv/Presidentes Kamala Harris, do të varet nga rezultati i zgjedhjeve në disa shtete ndër të cilat Pennsylvania, Georgia, Arizona dhe Nevada.

Senati, ndër të tjera konfirmon nominimin presidencial për zyrtarët e lartë, gjyqtarët, ambasadorët dhe mund ti bllokon nëse dëshiron.

Pse janë të rëndësishëm edhe postet e guvernatorëve?

Në 36 shtete federale sot zhvillohen zgjedhjet për guvernator.

Ndonëse këto gara janë më pak në fokus, mund të kenë pasoja afatgjate në vendimet lidhur me çështjet e abortit, armëve dhe mohimit të rezultateve të disa zgjedhjeve të ardhshme.

Demokratët po bëjnë përpjekje të mbajnë vendet e guvernatorëve në Pennsylvania, Wiskonsin, Michigan, në mënyrë që të mbajnë të drejtën e vetos sepse shumicën në parlamentet e këtyre shteteve federale e kanë republikanët, që mund të shtojnë kufizimet në të drejtën e abortit etj.

Republikanët pretendojnë të fitojnë në shtetet që janë të rëndësishme për zgjedhjet e ardhshme preidenciale në vitin 2024, siç është Arizona. Partia ka kandiduar në këto shtete edhe ata që janë të bindur se zgjedhjet e vitit 2020 janë vjedhur, ashtu siç thekson ish-presidenti Donald Tramp.

Aktualisht republikanët kanë 28 poste guvernatori, e demokratët 22.

Demokratët kanë shpresa që nga republikanët të marrin postet e guvernatorit në Maryland dhe Massachusetts, por në shtetet tjera ku po votohet, gara është shumë e ngushtë./VOA/