Amerikanizmi në markatën e Edi Ramës!

nga Agim Popoci

Markata politike Edi Ramës për popullin shqiptar, në mungesë të programeve konkrete, gjithmonë kishte oferta kriminale që dedikoheshin për Ne dhe Ata!

Në betejën për Kryeqytetin dhe së fundi Kryeministrin, markata e Edi Ramës  ofronte akuza për partinë dhe rivalët e tij politik që kishin të bëjnë me moralin familjar, vitin e tmerrshëm 1997, berishizmin, alpinët dhe së fundi sërish berishizmin me të cilin sondazhet i tregonin se nuk mund të fitoi, dhe futi duart në zgjedhjet e 25 Prillit. Por, jo e gjitha përfundoi këtu sepse masakra e 25 Prillit duhet  të “arsyetohej” me një gjëmë të madhe që duhet të binte mbi Partinë Demokratike dhe Shqipërinë!

Amerikanizmi ishte zgjidhja! I përdorur nga një lider i partisë komuniste si Edi Rama mund të duket absurd për një botë normale, por jo edhe për Shqipërinë;  Sepse, aty ku njeriu para vetëm tre dekadave kërkonte varjen e të gjithë komunistëve, sot është kryetar i tyre! Pra, asgjë nuk është rastësi, siç u shprehën dhe krerët e kësaj partie kriminale, kur u kujtuan se kishin djalin e Kristaqit, dhe e sollën nga rrugët e Parisit për ta vënë në krye të PPSH, pra PSSH!

Ndonëse patronazhistët komunistë që ishin futur në çdo familje shqiptare zbuluan shumë çudira por jo dhe kundërshtarë të SHBA ndër demokratë, Edi Rama, analizoi mirë sjelljen e tyre përgjatë karrierës së tij politike, ku në mungesë të një lidershipi korrekt u dëgjuan dhe akuza të tipit “kinezi Lu” dhe “koreania Kim”.

Shumë kohë më parë Presidenti i 29-të i Shteteve të Bashkuara, Warren Gamaliel Harding, ishte shprehur:

“Nuk di shumë për Amerikanizmin, ama është fjalë tmerrësisht e mirë që mund të udhëhiqen zgjedhje!”

Nëse kësaj i shtojmë dhe lidershipin konfuz të Partisë Demokratike që simotër ka Partinë Republikane në SHBA dhe bashkëpunon me Partinë Demokratike, terreni nuk ka se si të konsiderohej ndryshe përveç se ideal për Edi Ramën dhe impiantin e tij propagandistik!

Në prag të 25 Prillit, të dhënat që vinin nga terreni i tregonin Edi Ramës se përballë ka një delirant në krye të Partisë Demokratike që mjaftohet me pakënaqësinë  që mbretëron ndër shqiptarë nga keqqeverisja, dhe e projekton veten si Kryeministër ndërsa bashkëpunëtorët e tyre janë vetë emëruar dhe ministra! E Sali Berisha si “shef” i Lulzim Bashës nuk po ndërsente më njeri, madje as socialistë, pas zhdukjes nga faqja e dheut që Basha i bëri themeluesve të PD në vitin 2017.

Ndërkohë elektorati PD kishte filluar të dyshonte në fitore pas  qëndrimit të Amerikës me disa deklarata të çuditshme të Ambasadores Yuri Kim! Dhe, qershinë mbi tortë e vendosi Presidenti i Republikës, Ilir Meta, dy ditë para zgjedhjeve duke kërcënuar  Ambasadoren e SHBA, Yuri Kim, e cila nuk përtoi ti kthej përgjigje po aq kërcënuese; Por, duke folur në emër të opozitës, Meta i bëri me dije Ambasadores amerikane se hataja edhe mund të ndodhë!

Hataja ndodhi jo në mënyrën e Metës, Edi Rama i fitoi zgjedhjet dhe deri sa opozita po priste raportin e OSBE, Shtetet e Bashkuara e pranuan rezultatin e zgjedhjeve.

Duke pasur parasysh mënyrën se si fitoi dhe paralajmërimet që i bëri Ambasadorja amerikane, Edi Rama filloi me lëvizjet e tij që t’iu gjejë demokratëve fajtorin e të gjitha këqijave pse ata janë në opozitë për 8 vjet!

U shigjetua Amerikanizmi! Kjo mburrje ndër demokratë me goditjen e së cilës mund të lëndohet shumë lehtë secili nga anëtarët e Partisë Demokratike.

Në mungesë të një përgjigje nga Partia Demokratike ose personalizimi i “të këqijave” që po vinin nga deklaratat e Ambasadës së së SHBA, që lidershipi i PD nuk po i deshifronte, gjithçka u la në rënie të lirë madje dhe mllefi që shpërtheu në rrjetet sociale.

Këtu Edi Rama nuk pushoi dhe e studio mirë para se ta fuste në markatën politike ndërkohë që për demokratikët Amerikanizmi ishte dhe ngeli, thjeshtë ajo mungesë lirie e cila mund të gjendet vetëm në Amerikë.

Sali Berishës si legjendë urbane që i pengonte Lulzim Bashës i erdhi fundi në mënyrën më të shëmtuar të mundshme. Lideri historik u shpall person NON GRATA dhe meqë kjo erdhi pas paralajmërimit të shumë kohëve më parë nga Kryeministri Edi Rama, dhe fjetjes gjumë të lidershipit demokrat, Amerikanizmi në PD u shkërmoq si një kullë prej letrës.  

Demokratët shpërthyen me akuza ndaj Ambasadores Yuri Kim, Sekretarit të Shtetit dhe SHBA ndërsa Edi Rama doli në skenë me Amerikanizmin e tij të famshëm dhe kundërshtarët që ka në Shqipëri!

Me diplomacinë amerikane dhe kreun e saj Antony Blinken hapi frontin juridik i akuzuari Sali Berisha, ndërkohë që ditët po kalojnë dhe PD po vazhdon shkërmoqjen, Edi Rama nuk mori përgjigje!

Pse?! Janë shumë pikëpyetje por një e paqartë e madhe është pse lidershipi i PD nuk u pozicionua qartë ndaj Amerikanizmit përkatësisht Antiamerikanizmit!

Është e qartë se mllefi demokratë nuk do të ndalonte nëse Amerikanizmi do të sqarohej në fushën e linguistikës, nëse do thuhej se Amerikanzimi si shkencë është në funksion të studimit të gjithçkaje që lidhet me Amerikën, ose dhe zbulimet në psikologji, se ka individ me ndjenja atdhedashurie ndaj kombit dhe kontinentit amerikan, dhe në fund fare se Amerikanizmi është lëvizje e cila ka krijuar popullsinë amerikane katolike të shekullit XIX, e kisha e konsideron herezi, dhe kjo është arsyeja që e dënon me shfarosje!

Jo!

Elektorati demokratë duhet të sqarohet se deklarata aspak diplomatike e Ambasadores amerikane Yuri Kim se “do të ishte ironi historike, por edhe tragjedi për këtë vend, jo vetëm për partinë, që partia të hajë bari për shkak të interesave personale të një njeriu,” dhe ajo e sapoardhur nga Washingtoni se “i thashë Kryetarit Basha se Washingtoni mbetet i përkushtuar për të punuar akoma më ngushtë me Partinë Demokratike. Ne ishim pranë Partisë Demokratike kur ajo mori pushtetin për herë të parë dhe shpresojmë që të kemi mundësi të festojmë prapë kur ajo të marrë pushtetin sërish,” nuk janë për konsum të brendshëm nga Ambasada ose për Lulzim Bashën, dhe as për prodhim mllefi antiamerikan në PD!

Lidershipi i PD duhet të zbres në bazën demokrate edhe sot kur tashmë është e qartë se Lulzim Basha nuk do të jetë më Kryetar, për të sqaruar të gjithë ata që nuk e kuptojnë, se fitorja e Partisë Demokratike dhe Kryetarit të saj duhet të certifikohen nga Amerika ndryshe do të jenë nul!

Pse?! Në “Rrëfimi i shërbëtores”, Margaret Atwood e sqaron shumë qartë se nuk ekziston vetëm një liri:

“Ekziston liria PËR dhe liria NGA. Në ditët e anarkisë ekiztonte liria PËR, tani ju është dhënë liria NGA!”