Amnistia fiskale/ Gati në Maj, Edi Rama: Ja kush përfiton dhe përjashtimet…

Kryeministri Edi Rama duke prezantuar sot Draftin e Amnistisë Fiskale ka bërë me dije se do të kalohet këtë javë në qeveri dhe në muajin maj pritet të miratohet në Parlament.

Aministia Fiskale, sipas Edi Ramës, do të ndahet në tre faza, ku në fazën e parë detyrimi i pagesës do të jetë 5%, në të dytën 7% dhe në të tretën 10%.

Kryeministri premtoi se nga Amnistia Fiskale përjashtohen politikanët, personat që kanë kryer veprimtari kriminale dhe korrupsion, zyrtarët e Policisë, Gjykatave, Prokurorive por edhe të insitucioneve të tjera të larta.

”Amnistinë fiskale do e kalojmë këtë javë në qeveri dhe më pas do e dërgojmë në Kuvend ku do të miratohet në maj. Amnisti fiskale. Amnisti e domodoshme pasi për 30 vjet me radhë ne e dimë shumë mirë që në radhë të parë qindra mijëra qytetarë në emigracion kanë punuar punë nga më të ndryshmet dhe kanë plot kursime që e kanë pasur dhe e kanë ende sot t’i depozitojnë në banka. Duke vazhduar edhe me shumicën dërrmuese në Shqipëri që si rezultati i transformimit të madh ekonomik dhe rrënjës në raportin mes individit dhe sistemit në një ecuri në të përpjetë në vitet ’90 dhe më pas kanë kursime të cilat padiskutim janë të interesuar t’i depozitojmë po ashtu dhe kompanitë që kanë të ardhura dhe të kenë mundësi t’i depozitojnë në banka. Amnisti gjithpërfshirëse të të gjithë atyre që jetojnë jashtë vendit dhe këtu dhe që janë në nevojën 30- vjeçare për të formalizuar paranë joformale që kanë në dispozicion.”

Edhe me këtë rast, Edi Rama tha se Amnistia Fiskale ndalon riciklimin e të ardhurave nga aktivitete kriminale dhe të ardhurat nga korrupsioni.

“Nuk amnistohen. Pra përjashtohen ata që janë të dënuar për aktivitetet e caktuara që hyjnë në veprimtarinë kriminale. Po ashtu përjashtohen padiskutim politikanët, zyrtarët e lartë së bashku me rrethin e tyre familjar dhe ata që militojnë në Polici, Gjykatave, Prokurorive apo në radhët e rangjeve të larta dhe administratës. Gjithë të tjerët përfitojnë, do të përfitojnë, kur të miratohet në Kuvend.”

Çdo qytetar që ka pashaportë shqiptare, tha Kryeministri Edi Rama, mund të përfitojë nga Amnistia nëse nuk është në kategoritë përjashtuese ndërkohë mendohet se Amnistia Fiskale do të ketë kohëzgjatje prej 1 viti dhe të ndahet në 3 fasha, 4 mujore:

Faza 1 – Detyrimi për të depozituar paratë – 5%

Faza 2 – Detyrimi për të depozituar paratë – 7%

Faza3-  Detyrimi për të depozituar paratë – 10%