Amnistoi Erion Veliajn dhe Ilir Beqajn, Berisha: Do ngremë padi penale ndaj SPAK!

Sot Kryetari i Partisë Demokratike, Sali Berisha, bëri të ditur se PD do ngrejë padi penale ndaj SPAK-ut për amnistitë ndaj Erion Veliajt dhe Ilir Beqajt, përkatësisht ndaj prokurorëve Kraja dhe Prençi, për këtë akt të pashembullt ndonjëherë në historinë e hetimit.

“Kushtetuta e Shqipërisë ndaj qartë pushtetet. Amnistinë Kushtetuta ia njeh si të drejtë parlamentit shqiptar dhe këtë të drejtë, ajo ia njeh parlamentit me votim të cilësuar, dmth me tre të pestat e tij.
Por Skapi i partisë ka marrë përsipër të bëjë rolin e parlamentit, të ushtrojë amnisti për krime ndër më të rëndat.

Në një kohë kur falë kësaj drejtësie, të rinj varen në qeli njëri pas tjetrit për një krim minor, të burgosur për një krim minor, zyrtarë si Edi Rama dhe Erion Veliaj diktojnë listën se kush do të dënohet dhe kush nuk do të dënohet në aferat e tyre të mëdha korruptive.

Pas amnistisë për së dyti, që Skapi i partisë i bëri Beqajt, ndodhi edhe amnistia e vjedhjes së shekullit.
Në 110 faqe, prokurorët e Skapit pas hetimeve të tyre të djegësit të Tiranës, lëshuan 15 urdhra arresti, por nuk përmendën njëherë të vetme emrin e kryesorit në këtë aferë, Erion Veliajt.

Ata de facto amnistuan njeriun përgjegjës më kryesor së bashku me Edi Ramën për zhdukjen e 130 milionë eurove të taksapaguesve dhe bizneseve shqiptare për vjedhjen e tyre.

Në këtë kontekst, PD do ngrejë padi penale ndaj skapistëve Kraja, Prençi për këtë akt të pashembullt ndonjëherë në historinë e hetimit.

Në materialin që do paraqesë zoti Këlliçi, ju do të dëgjoni se çfarë diferencash ekzistojnë midis padive të ngritura në grupe të ndryshme, pasi Spaki e zbërtheu çështjen në disa çështje me qëllimin e vetëm të mos flasë për organizatë kriminale.
Arriti deri aty sa të lëshojë 15 urdhra arresti dhe të mos flasë për organizatë kriminale pasi kreu i saj i dilte Edi Rama dhe ndër të, Erion Veliaj.
Prandaj dhe ne do ngremë padi penale për këtë vepër të rëndë të skapistëve të partisë.

Sikundër e njëjta parti do ngrihet për amnistinë që iu bë Ilir Beqës për sterilizimet.

Ngritja e padive penale ndaj Skapit, në pamje të parë është një akt komik.

Të besosh se Skapi do të hetojë veten dhe do të gjykojë veten, është njëlloj si të besosh rrethin katror.

Por, njëra anë është Skapi, anë tjetër është Kushtetuta dhe institucionet e saj.

Ndaj dhe ne nuk do ngurrojmë në një seri padish penale ndaj Skapit, Edi Ramës, Erion Veliajt dhe të gjithë atyre që kanë konsumuar vepra të rënda penale duke shfrytëzuar pushtetin e tyre për pasurim si të pangopur,” tha Sali Berisha duke u shprehur qartë se SPAK do të akuzohet me vetë dosjet e tij.

“Pra, siç e shihni, Skapi do të akuzohet me vetë dosjet e tij.

Me vetë dosjet e fraksionuara, fraksionim i cili ka pasur vetëm një qëllim: mosshpalljen e kësaj afere, e këtij korrupsioni të shekullit të Edi Ramës si kreu i organizatës kriminale.

Mirëpo krahasimi i 3 padive të bëra fundos përfundimisht Skapin dhe ekspozon atë si një organ amnistie që i merr kompetencat parlamentit kundrejt urdhrit politik apo miliona eurove që disponohen në këtë aferë për të mbyllur gojë, për të mbyllur dosje, për të mbyllur media,” tha lideri opozitës duke saktësuar se kjo është hera e parë që një forcë politike ngre padi politike ndaj prokurorisë politike të Edi Ramës.

“A ka mundësi të përqendrohemi në evenimentin se për herë të parë jo dëgjoni një forcë politike që ngre padi politike ndaj prokurorisë politike të Edi Ramës.

I thotë mjaft është mjaft, ke tejkaluar çdo vijë të kuqe dhe tani për PD-në konsiderohesh një organizatë kriminale që merr pushtetin e parlamentit dhe amniston persona që kanë firmosur për 1 miliard euro, por që kanë zhdukur realisht 130 milionë euro nga paratë e taksapaguesve.

Kjo është çështja kryesore e ditës, e pandodhur.”

Në fund, Kryetari i Partisë Demokratike dha edhe fakte tjera pse kjo padi penale do ngrihet ndaj Prençit dhe Krajës, ku vlojnë miliona euro.

“Kjo padi penale ngrihet kundër Prençit dhe Krajës.

Sepse Kraja i ka nip dhe mbesë në dy sqetullat e Erion Veliajt.

Përveç urdhrit politik, mos harroni se këtu vlojnë miliona euro. Se janë 130 milionë, për të cilët Erion Veliaj nuk kontrolloi një ditë, me qëllim që të vidhet, zbatimin e projektit. Se kishte një projekt.

Në këtë rast, për këta të dy.

Por rast pas rasti ne do ngremë padi për çdo amnisti. Ne besojmë se amnistia është e drejtë e parlamentit dhe jo kurrë e prokurorisë.

Si mund të bindesh ti që Ilir Beqaj nuk qenka përgjegjës kryesor, kur ka kryer hallkë pas hallke, veprime kryesore për sterilizimin?

Dhe pasi e ktheu një gjykatës amnistinë e parë, i japin amnistinë e dytë duke bërë dudumin. Duke thënë se është fajtor që nuk ka zbuluar konfliktin e interesit të këtyre të dyve. Që nuk ka asnjë detyrim ai të zbulojë atë. Kanë detyrim ata që janë në konflikt interesi të deklarojnë se janë në konflikt interesi. Është universale kjo.” tha Kryetari i Partisë Demokratike, Sali Berisha, duke përfunduar:

“Atëherë do paditen edhe ata që kanë bërë amnistinë e dytë.

Do mbrojmë interesin publik ndaj një grupi që siç tha Edi Rama, individi paguhet më shumë se presidentë të rajonit.

Populli nuk i paguan ata në këtë mënyrë për të amnistuar krimet e shëmtuara financiare, të padëgjuara, qindra milionëshe.

I paguan për të zbatuar ligjin.”