Anëtarë dhe sekretarë të KZAZ-ve për 14 majin, PD dorëzon emrat në KQZ

Partia Demokratike ka dorëzuar sot në KQZ emrat e anëtarëve dhe sekretarëve të KZAZ-ve për zgjedhjet e 14 majit.

Duke ju drejtuar përmes një shkrese, Sekretari i Përgjithshëm i Partisë Demokratike, Flamur Noka, i ka dërguar Komisionerit Shtetëror të Zgjedhjeve, Ilirian Celibashi, listën e plotë dhe dokumentacionin përkatës të komisionerëve dhe sekretarëve të propozuar të PD për zgjedhjet vendore të 14 majit.

“Në vijim të shkresës nr. 186 prot., datë 16.01.2023 si dhe bazuar mbi parashikimet e nenit 29 të Kodit Zgjedhor të Republikës së Shqipërisë, si dhe Vendimit nr. 06. dt. 09.01.2023 të Komisionerit Shtetëror të Zgjedhjeve ‘Për caktimin e partive politike që do të propozojnë anëtarët dhe sekretarët e Komisioneve të Zonave të Administrimit Zgjedhor për zgjedhjet për organet e Qeverisjes Vendore të datës 14 maj 2023″, lutem gjeni bashkëlidhur listën e plotë dhe dokumentacionin përkatës të komisionerëve dhe sekretarëve propozime të Partisë Demokratike të Shqipërisë”, thuhet në shkresë.

Ndërkohë që KQZ-ja do të shprehet me vendim kur të dorëzojë listën me emra edhe mbështetësit e Lulzim Bashësqë menaxhohen me devotshmëri nga Enkelejd Alibeaj, mësohet se afati për dorëzimin e emrave mbaron mbrëmjen e së dielës.

Ndryshe, pak ditë më parë kreu i KQZ, Ilirian Celibashi deklaroi se në momentin që do të vijnë propozimet për anëtarë të KZAZ do të vlerësohet legjitimiteti i atij personi që në emër të PD paraqet këto propozime.

“Ne do të vlerësojmë legjitimitetin e atij që përcjell dokumentacion në KQZ. Në kuptimin është apo nuk është ky person me tagër për të sjellë në emër të PD-së kërkesa të ndryshme, propozime. Ky legjitimitet është i verifikueshëm nga dokumentacioni që KQZ merr nga Gjykata e Tiranës,” sqaroi Ilirian Celibashi.