Ankandi i Albpetrol, oferta fituese rreth 72 milionë euro për 120 mijë ton naftë

Ankandi për shitjen e 120 mijë tonëve naftë nga kompania publike Albpetrol është mbyllur me një ofertë fituese.

Bëhet fjalë për bashkimin e dy operatorëve ekonomikë Euro Petrol Durrës Albania” “R.B.H. Belinë” sha të cilëve Albeptrol u ka kërkuar që të paguajnë si fillim 10 për qind të shumës së kontratës që përkon me një vlerë 877 milionë lekë.

Automatikisht kjo bën që oferta finale që ka marrë Albeptrol për shitjen e 120 mijë tonëve naftë të jetë mbi 8.7 miliardë lekë apo rreth 72 milionë euro.

Kjo është një shifër relativisht e lartë për Albeptrol nëse gjithçka do të shkojë sipas planit dhe që është favorizuar nga situate në tregjet globale ku çmimi i naftës ka arritur nivele rekord. Në formulën që përdoret për llogaritjen e çmimit në rastin e ankandit është në referencë edhe çmimi në bursat e huaja.

Konkretisht Bashkimi i Operatorëve Ekonomikë “Euro Petrol Durrës Albania” sha dhe “R.B.H. Belinë” sha ka ofruar për këtë ankand çmimin: 75.33 % e Çmimit Brent – 3.36 USD/bbl + K (K= 0.0105 USD/bbl).

“Rrjedhimisht, jeni te lutur të paraqisni pranë Albpetrol sha, rruga Fier – Patos km 7, sigurimin e kontratës ne vleren 877,201,661 (tetëqind e shtatëdhjetë e shtatë milion e dyqind e një mijë e gjashtëqind e gjashtëdhjetë e një) Lekë, në masën 10% te vlerës së përllogaritur te kontratës, siç parashikohet në dokumentet e ankandit, dhe te nënshkruani kontratën brenda 15 (pesëmbëdhjetë) ditëve nga dita e marrjes së këtij njoftimi”, thuhet në publikimin e Albpetrol.

Kohëzgjatja e kontratës është 12(dymbëdhjetë) muaj nga data e fillimit te evadimit.

Ky është ankandi i parë i suksesshëm pas shumë kohësh zhvilluar nga Albeptrol ku në disa raste ato dështuan duke mos pasur interes.

Kjo erdhi edhe në kushtet e pandemisë kur interesi për nxjerrjen e naftës apo përpunimin ra në minimum për shkak të kufizimeve dhe uljes së aktivitetit ekonomik globalisht. Kompanitë e nxjerrjes dhe prodhimit të naftës në botë dhe në vendin tonë njoftuan për ulje të prodhimit në minimum për shkak të leverdishmërisë së ulët në këtë proces.

Me heqjen e kufizimeve dhe rikthimin e normalitetit nafta dhe energjia pësuan rritje të dukshme që erdhi si efekt i kërkesës së lartë. Situata në Ukrainë nga ana tjetër i dha shtytjen finale çmimeve të cilët arritën nivele rekord dhe të paimagjinuara më parë në tregje./Monitor/