Ankimohet rezultati i 11 majit, Ilir Alimehmeti kërkon rinumërimin e votave në Tiranë

Pas verifikimit të filmimeve të kamerave që u janë vënë në dispozicion ku rezulton një parregullsi në masën rreth 5 për qind të votave të numëruara ndërkohë diferenca mes kandidatit të renditur përpara në listë është tejet e ngushtë, rreth 1.2 për qind, kandidati i Koalicionit “Partia Demokratike – Aleanca për Shqipërinë Madhështore” në zgjedhjet e 11 majit, Ilir Alimehmeti, ka ankimuar rezultatin, duke kërkuar rinumërimin e votave në Qarkun Tiranë.

“Komisioneri Shtetëror i Zgjedhjeve, me vendimin nr. 1326, datë 24.05.2025, ka miratuar tabelat përmbledhëse për rezultatin e votimit në zonën zgjedhore Qarku Tiranë. Bashkëngjitur këtij vendimi, në tabelën përmbledhëse të rezultatit për subjektin tonë zgjedhor, rezulton se unë, Ilir Alimehmeti, kam marrë 18,128 vota si kandidat i listës së hapur, duke u renditur i dyti nga kandidatët e listës së hapur. Referuar numrit të përgjithshëm të votave të subjekteve sipas këtyre tabelave, nga listat e subjektit tonë zgjedhor mund të zgjidhet vetëm 1 deputet nga listat e hapura, që referuar parashikimeve të Kodit Zgjedhor me ndryshimet e bëra së fundmi, është kandidati më i votuar.

Gjatë procesit të verifikimit të filmimeve të kamerave nga ana jonë, për një numër të kufizuar të cilat na janë vënë në dispozicion nga administrata e KQZ-së, janë vërejtur disa parregullsi që mund të ndikojnë në ndryshimin e rezultatit në mënyrë të ndjeshme. Në këto kushte, po paraqes këtë ankim pranë KAS, bazuar edhe në dispozitat e Kodit Zgjedhor,” thuhet në ankimimin e Ilir Alimehmetit ku sqarohet se bazuar në këqyrjet rezulton një parregullsi në masën rreth 5 për qind të votave të numëruara.

“Duke pasur parasysh faktin që subjekti ynë ‘PD-ASHM’ ka marrë 164,316 vota, rezultati për kandidatët mund të ndryshojë, në kushtet kur diferenca midis meje dhe kandidatit të renditur përpara në listë është tejet e ngushtë, ose rreth 1.2% e numrit total të të gjitha votave të subjektit. Vetëm në QV 1834/00, rezulton se 27 vota preferenciale për Ilir Alimehmeti i janë kaluar një tjetër kandidati, duke u shënuar në tabelën përmbledhëse 0 vota,” thekson kandidati i Koalicionit “Partia Demokratike – Aleanca për Shqipërinë Madhështore” në zgjedhjet e 11 majit, Ilir Alimehmeti, duke renditur dhe qendrat e votimit ku ai ka konstatuat këto probleme ndërsa përfundon:

“Qendrat e votimit të mësipërme krijojnë bindjen se numërimi ka pasur problematika në të gjithë Qarkun e Tiranës, duke krijuar shkak për rinumërimin dhe/ose rivlerësimin e të gjitha Qendrave të Votimit.

Duke u bazuar në të dhënat e mësipërme, përfundimisht:

KËRKOJ:

Rinumërimin dhe/ose rivlerësimin e të gjitha Qendrave të Votimit të Qarkut Tiranë;

Ndryshimin e Tabelës Përmbledhëse sipas rinumërimit dhe/ose rivlerësimit të votave.”

Ndryshe, bazuar në rezultatin përfundimtar të zgjedhjeve të 11 Majit, e para në listën e hapur të Koalicionit “Partia Demokratike – Aleanca për Shqipërinë Madhështore” u rendit Jorida Tabaku me 20.586 vota duke marrë dhe mandatin e deputetit, ndërkohë i dyti ishte Ilir Alimehmeti me 18.128 vota, që nuk i mjaftuan për të fituar mandatin e deputetit bazuar në rezultatin përfundimtar.