Annalena Baerbock, Presidente e re e Asamblesë së Përgjithshme të OKB-së
Ish-Ministrja e Jashtme e Gjermanisë, Annalena Baerbock është zgjedhur Presidente e Asamblesë së Përgjithshme të Kombeve të Bashkuara me një shumicë dërrmuese votash.
Përmes një votimi të fshehtë, 44-vjeçarja Annalena Baerbock, arriti të marrë 167 vota, 14 anëtarë abstenuan, ndërsa shtatë të tjerë votuan për kandidaten tjetër.
Zgjedhja e saj në seancën plenare para 193 vendeve anëtare të OKB-së është konsideruar formalitet, mirëpo votimi sekret është mbajtur, siç raporton RFE, me kërkesë të Rusisë.
Në fjalimin e saj, Baerbock tha se dëshiron të udhëheqë këtë institucion si ndërmjetëse e sinqertë dhe unifikuese.
“Dera ime do të jetë gjithmonë e hapur për secilin,” tha ajo dhe duke iu referuar krizave të shumta në botë, shtoi se “po jetojmë në kohë sfiduese, dhe jemi duke ecur në një litar të tendosur të pasigurisë” ndërsa përfundoi:
“Por, ne kemi jetuar edhe më parë nëpër kësi periudha të vështira. Na përket neve që të merremi me këto sfida.”
Annalena Baerbock pritet të inaugurohet më 9 shtator, pak para nisjes së seancës vjetore të Asamblesë së Përgjithshme të Kombeve të Bashkuara.
Ky post njëvjeçar është kryesisht ceremonial, dhe nuk duhet të ngatërrohet me rolin e Sekretarit të Përgjithshëm të OKB-së, Antonio Guterres, raporton RFE.
Guterres ka shprehur mbështetje të plotë për Baerbockun, duke përmendur përvojën e saj si ministre e Jashtme e Gjermanisë.
“Le të mos harrojmë rëndësinë historike që ajo është vetëm gruaja e pestë që zgjidhet presidente e Asamblesë së Përgjithshme,” tha mes tjerash Antonio Guterres.
