“Anti-KÇK”/ Ky që i thotë vetes Kryeministër: I ashtuquajturi President dhe Opozita po mbrojnë kriminelët!
Deri sa u mundua të bindë opinionin publik për domosdoshmërinë e miratimit të Aktit normativ “Anti-KÇK” meqë votat nuk i ka më problem, Kryeministri Edi Rama sot nga foltorja e parlamentit akuzoi Presidentin Ilir Meta dhe gjithë opozitën se mbrojnë kriminelët që janë subjekt i operacionit “Forca e Ligjit” ndërkohë qeverisë me vendin si dhe të parin e policisë, Ish-Gjeneralin Sandër Lleshaj, që bënë si i fortë
“Shqiptarët nuk pyesin për syzet e diellit në ditë me shi, të asaj vajze, por pyesin për shiun e lotëve të shumëkujt, që ka një zë publik, përfshirë dhe juve, për ata që ua kanë fshirë diellin nga sytë viktimave të krimit të organizuar. Për ata që u kanë fshirë diellin nga sytë mijëra vajzave të rrëmbyera, të trafikuara dhe të abuzuara nëpër rrugën e Evropës. Për ata që u kanë fshirë diellin nga sytë mijëra prindërve, që i shohin fëmijët e tyre të droguar, për ata që iu kanë fshirë diellin nga sytë shumë e shumë jetimëve, që kanë mbetur pa baballarë, sepse ua kanë vrarë këta, për të cilët zotrote flet për një tufë me dhi andej.
Unë nuk jam aspak i befasuar nga gjithë përkrahja e befasishme që ka gjetur elita e krimit të organizuar, sapo ne e kemi shpallur betejën më të skajshme kundër kësaj mortje, që e ka tollovitur Shqipërinë 3 dekada me radhë, që e ka tollovitur jetën publike 3 dekada me radhë që falë të gjithë horrave e hipokritëve me kostum që kanë pasur një mikrofon në dorë, e kanë bërë horr Shqipërinë edhe në sytë e shumë njerëzve, që shqiptarë nuk janë, por që e ndjekin vendin tonë, shkruajnë e hedhin helm për vendin tonë,” tha Edi Rama me të cilin, eksponentët e botës së krimit dalin në shumë foto të publikuara gjatë këtyre ditë të luftës që po zhvillon me njeriun që na e dhe për peshqesh si president, Ilir Metën.
“Teksa vija e kuqe mes shtetit dhe krimit është më e fortë se kurrë më parë, ngrihet një koalicion kaq i larmishëm mes segmentesh dhe protagonistësh që vijnë nga të gjitha rrugët e jetës publike, nga mediat te i ashtuquajturi President, nga opozitat këtu pak çaste para meje te ato në rrugë, deri te Avokati i Popullit, për t’i çarë hallin këtyre të shkretëve, që kanë vrarë, përdhunuar, trafikuar, grabitur pronat, sa kanë mundur, që kanë shantazhuar, sa nuk merret as me mend njerëzit dhe sipërmarrësit e këtij vendi dhe që tani medemek po dhunohen. Po dhunohen në të drejtat e tyre njerëzore. PO turp nuk ju vjen fare! Gjithë këtyre njerëzve, që kanë një mikrofon, kanë mundësinë të thonë një fjalë, dhe janë bërë karvanë qorrash për të bërë pelegrinazhin në drejtim të qelive ku janë kyçur ata, duke çuar mesazhin se ‘ne jemi me ju. Ju ca prisni? Ngrihuni, bashkohuni dhe bëni atë që duhet bërë, mundësisht na hiqni qafe fiziksisht’!” tha Kryeministri Rama për vijën të cilën vetë ai e sheh ashtu si dhe turpin që e kërkon nga njeriu që vetëm ai mund ta bënte President dhe e bëri, ndërsa akuzon opozitën të cilës vetëm ajrin i ka lënë, pa pasur të drejtë në tokën dhe ujin ndërsa përfundon me një togfjalësh të çdutishëm:
“Deri kur ne shpallëm këtë ofensivë dhe kur lufta jonë me krimin se kishte marrë këtë përmasë, po këta, këto viktima të shkeljes së të drejtave të njeriut, ishin djalli vetë nën sqetullën tonë, mbi prehrin tonë, dhe tani këta u kthyen në disa robë zoti, që duhen marrë në mbrojtje, sepse janë viktimë e qeverisë dhe e shtetit policor.”
Por kur fol për Anti-KÇK, Kryeministrit Edi Rama nuk do ti quhej po të mos përgojonte gjyqtarët dhe prokurorët. Sulmoi gjyqtarët e prokurorët, që sipas tij, duke ndjerë frikën e Vettingut, po kapin ç’të kapin, KÇK. Ai foli për lirimin e disa kriminelëve të dënuar me burg të përjetshëm, duke thënë se këta gjyqtarë e prokurorë jo vetëm po kapin thasët me para, por po kapin edhe pronat e shqiptarëve. Dhe sërish fajtorin nuk e gjen ndër ministrat e qeverisë së tij që është më e dështuara dhe më kriminalja në hsitorinë shqiptare por akuzoi opozitën si mbështetjen më të madhe të KÇK dhe grabitjes së pronave.
“U lirua një kriminel me burgim të përjetshëm nga një noterë, apo llogaritare, në një buzë mali. Dhe thonë që ja reforma në drejtësi ka dështuar. Çfarë iu shqetëson juve, që këta njerëz, që vettingun nuk e kalojnë dot, thonë ‘kap ç’të kapësh, derisa ta kesh në dorë’. Dhe këta kapin jo thjesht thasët me para nga këta tjerët, por kapin çdo ditë pronat e shqiptarëve, prona të njerëzve, të cilët mesa kam dëgjuar, ju i përfaqësoni. Ju jeni ata të pronarëve, që qani hallin e tyre. Ju jeni pa dashje mbështetja më e madhe e KCK dhe grabitjes së pronave, sepse e drejtoni tytën gabim. Uleni në vendin e gabuar dhe e rrotulloni helikën në vendin e gabuar dhe bëni një zhurmë që ndihmon vazhdimin e punës me qetësi.”
