Anulohet festivali “Beerfest” në Kosovë

Në Kosovë është anuluar mbajtja e festivalit të birrës “Beerfest” për shkak të rritjes së rasteve me COVID-19 gjatë ditëve të fundit.

Organizatorët e festivalit, njoftuan përmes një postimi në rrjetin social Facebook se, mbajtja e edicionit të 10-të të festivalit është anuluar “pas një vendimi të Policisë së Kosovës ku thuhet se mbajtja e këtij festivali paraqet rrezik për qytetarët”.

Kompania që e organizon festivalin, Modus Event Management, thotë se është pajtuar me këtë vendim, pavarësisht faktit se “Beerfest nuk dallon në thelb nga aktivitetet dhe festivalet që po mbahen ditëve të fundit në Kosovë”.

Sot në Kosovë janë regjistruar 1.006 raste me COVID-19. Rreth dy javë më herët, me 26 korrik ishin shënuar 14 raste.

Masat kundër përhapjes së COVID-19 në masë të madhe nuk po respektohen dhe sjellja e qytetarëve ndaj pandemisë është pothuajse shpërfillëse.

Gazetarët e RFE në Kosovë raportojnë se në shumë ambiente të mbyllura qytetarët nuk mbajnë maska mbrojtëse dhe distancë fizike.

Institucionet ende nuk tregojnë nëse, apo kur, do të vendosën masa shtesë për të parandaluar përhapjen e koronavirusit.

Zëdhënësi i Qeverisë së Kosovës, Përparim Kryeziu, i tha për RFE se “po zhvillohet takime të vazhdueshme me ekspertë shëndetësorë për të marrë rekomandimet e tyre konform situatës epidemiologjike dhe trendit të vaksinimit”.

Mikrobiologu kosovar, Lul Raka, thotë për RFE se shkaqet e rritjes së numrit të rasteve janë shpejtësia e përhapjes së variantit Delta, neglizhimi i masave parandaluese nga popullata përfshirë mosmbajtjen e maskave në objekte të mbyllura apo mjete të transportit publik, grumbullimet dhe intensifikimi i kontakteve.

Sipas tij nuk ka inspektime të mjaftueshme nga policia dhe inspektoratet qëndrore e komunale për respektimin e masave.