Apel për ndihmë, Rama: Të shmangim mbingarkesën e spitaleve dhe mbylljen e përgjithshme
Në daljen e tij publike, Kryeministri Edi Rama tha se do të fokusohet tek arsimi por kërkoj dhe ndihmën e të gjithëve që të jenë sa më të vetëdijshëm që kemi në dorë, secili në pozicionin e vet, të shmangim qoftë kalimin e spitaleve në një mbingarkesë që do ta bënte praktikisht tejet të vështirë trajtimin normal në vazhdimësi të atyre që janë në nevojë dhe qoftë mbylljen e përgjithshme.
“Sot do të fokusohemi tek arsimi, me fokus të posaçëm tek procesi i rindërtimit por jo vetëm.
Duke e shkurtuar ndjeshëm këtë herë dhe për shkak të formatit hyrjen time, dua të nënvizoj faktin që është me një rëndësi të posaçme dhe do të kërkoja dhe ndihmën e të gjithëve ju që më ndiqni që të jemi sa më të vetëdijshëm që kemi në dorë, secili në pozicionin e vet por patjetër së bashku si komunitet, si bashkësi që jetojmë në këtë vend, të shmangim qoftë kalimin e spitaleve në një mbingarkesë që do ta bënte praktikisht tejet të vështirë trajtimin normal në vazhdimësi të atyre që janë në nevojë dhe qoftë mbylljen e përgjithshme.
Është absolutisht e domosdoshme që secili prej nesh, çdo qytetar dhe qytetare të vetëdijesohet se ka një rol për të luajtur në këto dy drejtime. Pa diskutim në radhë të parë për të mbrojtur shëndetin e vet, të afërmve dhe miqve. Duke bërë këtë jep një kontribut të jashtëzakonshëm për të ndihmuar luftën e përditshme dhe të përnatshme në vijën e zjarrit kur trajtohen pacientët e prekur nga COVID dhe që kanë simptoma të rënda, qoftë për të shmangur një mbyllje që do kishte pasoja të padiskutueshme në ekonomi,” tha Edi Rama duke iu rikthyer Arsimit:
“Duke qenë se jemi sot për arsimin dhe kam ndjekur me vëmendje që ka së paku për sa kam mundur unë të konstatoj nga çfarë lexoj në faqen time dhe në rrjetet e mia sociale një zë të përsëritur për mbylljen e shkollave. Dua të theksoj dhe njëherë se çfarë hapet dhe çfarë mbyllet është përgjegjësi e autoriteteve tona të autorizuara që kanë të gjithë ekspertizën dhe autoritetin ligjor që të marrin vendime në këto kohë të vështira. Sipas të gjitha të dhënave dhe ndjekur të gjitha orientimet e autoriteteve shkencore, shëndetësore në të gjithë vendet që ne i ndjekim me shumë vëmendje për të mësuar sa më shumë shkollat nuk konsiderohen një vatër e nxehtë por një hapësirë që si të gjitha hapësirat e tjera kanë patjetër dhe potencialin e tyre të rrezikut,” tha Kryeministri i shoqëruar nga ministrja e Arsimit, Evis Kushi, ndërsa citoi ekspertët që thotë se i konsulton:
“Nga njëra anë është shumë e rëndësishme që masat të zbatohen nga çdo shkollë, siç po ndodh, që personeli drejtues dhe pedagogjik të jetë sa më i durueshëm dhe këmbëngulës në zbatimin e tyre dhe nga ana tjetër ajo çka kam dëgjuar nga ekspertët tanë është që në vlerësimet e përgjithshme që bëhen lidhur me shkollat, domosdoshmëria për të mbajtur një ekuilibër midis këtij aspekti, mbrojtjes së drejtpërdrejt dhe mbrojtjes psikologjike të fëmijëve është në rendin e ditës të kësaj vendimmarrjeje. Është një vendimmarrje në dorë të autoriteteve tona, nuk më takon mua, nuk na takon neve.”
Akuzën që disa mësues bënë gjatë takimit me Kryetarin e Partisë Demokratike, Lulzim Basha, se kanë frikë të thonë se janë me COVID-19 pasi mund të hiqen nga puna, Edi Rama e cilësoi absurditet .
“Është një absurditet i madh që të thuhet nga cilido që e ka thënë që nëse raportohet me COVID humb vendin e punës. Është absurde, një nga aktet e Lulzim Bashës me aktorë që shfaqen rreth tij ndërkohë që kanë ndonjë aktivitet në jetën e përditshme. Nuk ndodh, si mund të ndodhë, kush mund ta konceptojë që mësuesi humb vendin e punës nëse sëmuret.
Sa i përket asaj që një prind thotë që fshihen rastet dhe ky është një absurd total, nuk ka shans të ketë raste për t’u konsideruar nga sistemi dhe sistemit të mos i konsiderojë. Janë gjëra që thuhen midis morisë së gjërave që përfliten pa bazë në këto kushte,” tha Kryeministri duke i bërë thirrje të gjithëve t’i referohen autoriteteve shëndetësore, të dhënave zyrtare dhe të mbrohen nga virusi dhe lajmet e rreme.
“E kuptoj stresin, ankthin dhe nuk ka ankth më të madh se ankthi i prindërve për fëmijët por nuk mund ta imagjinoj të ndodhë që mësuesit të humbasin vendin e punës apo të largohen pa adresë e të mos deklarohen si persona të infektuar. ka dhe raste si gjithandej kur dikush pranë teje është i prekur në familjen tënde dhe ti për këtë shkak karantinohesh. Është gjëja më normale që mund të ndodhë, procedurë e zakonshme. Apo ti nuk ndihesh mirë, mund të kesh qenë në kontakt me dikë dhe karantinohesh. Nuk ka gjëra që fshihen se nuk ka asnjë arsye pse të fshihen. Nuk mund të fshihen.”
Akuzave të Kryetarit të PD-së, Lulzim Basha, se qeveria po fsheh numrin e viktimave, Kryeministri Rama iu përgjigj me akuza, duke theksuar se lideri demokrat po përdor vdekjen në luftën për pushtet, dhe se janë mjekët ata që përcaktojnë diagnozën e vdekjes, dhe ata mbajnë përgjegjësi deri penale për këtë gjë.
“Është e pamundur të fshihet numri i vdekjeve. Mjeku ka përgjegjësi për këtë gjë dhe të thuash këtë poshtërsi, duhet të mendosh ndër të tjera se mjekët na qenkan budallenj, që të shkelin ligjin për të ndryshuar diagnoza dhe kush do të përfitonte nga kjo, këtë do ta thoshte dikush që vë në lojë imagjinatën, që përdor edhe vdekjen në luftën për pushtet. Kjo gjë ndodh në të gjithë botën, ky proces është. Partitë politike nuk mund të vënë diagnoza.”
Lidhur me vaksinën për koronavirusin, çmimi tha Rama është gjëja e fundit që po diskuton qeveria ndërsa uroi që Shqipëria të mos mbesë mbrapa në këtë proces në raport me shtetet e tjera europiane.
“Ne kemi një grup personash, të cilët janë ekspertë, që po merren me vaksinën dhe uroj mos mbetemi pas me shtetet e tjera europiane. Çmimi është gjëja e fundit që diskutojmë në këtë moment. me rëndësi ka që vaksinat të sigurohen sa më shpejt. Asnjë vend sa shoh, nuk po fokusohet vetëm tek një vaksinë. Është proces shumë intensiv që po zhvillohet aktualisht përditë.”
