Apeli, Rama: Ndërpreni grevën, të bisedojmë! Naftëtarët: Harroje, duam rrogat e prapambetura!
Deri sa naftëtarët e Ballshit janë futur në ditën e 22 të grevës dhe sot gratë naftëtare i bën apel deputeteve dhe Ambasadores së SHBA, Yuri Kim që të reagojnë pasi situata sa vjen dhe përkeqësohet, Kryeministri Edi Rama tha se është i gatshëm të bisedojë me naftëtarët, por me një kusht, që ata të ndërpresin grevën e urisë. Edhe kjo ofertë e Kryeministrit ndonëse u dha përmes rrjeteve sociale mori përgjigje!
“U përsëris naftëtarëve të Ballshit që greva e tyre është e panevojshme, sepse unë jam me ta dhe qeveria është e tyrja! Ne jemi plotësisht të ndjeshëm ndaj hallit të tyre që është edhe halli ynë dhe është absurde që hallin t’ua qajnë ata që ua shkaktuan!” thekson Edi Rama duke ftuar ta ndërpresin grevën ndërsa shprehet përmes rrjtit social Twitter se është i gatshëm të ulet e të bisedoj me ta për këtë hall të përbashkët:
“Por jo kështu! Kështu jo, sepse presionet e ultimatumet nuk funksionojnë në asnjë familje dhe punëtorët e Ballshit nuk bëjnë përjashtim nga ky parim i panegociueshëm.”
Por gratë naftëtare i kthyen menjëherë përgjigje Kryeministrit Edi Rama duke u shprehur se greva nuk ndalet deri në pagesën e rrogave të prapambetura.
”Ta harrojë kryeministri që të ndalim grevën ne, po nuk erdhi këtu. Këtu do vdesim, pse kjo është zgjidhje? Nuk i besojmë, të gjitha mashtrime. Janë bërë të gjithë të pabesueshëm. Ai dhe Balluku të vijnë. S’ka reaguar fare, pse ky është reagimi, të dalim nga greva,” tha njëra prej naftëtareve ndërsa tjetra e plotësoi:
”Dua rrogat e prapambetura dhe rifillim të punës. Sytë e veshët i kemi vetëm tek Rama dhe Balluku. Kemi lënë familjet, jemi shumë keq nga gjendja ekonomike dhe shëndetësore,” tha naftëtarja greviste dhe të gjitha së bashku u shprehën qartë se do e lënë në moment grevën vetëm po iu hodhën lekët nga kryeministri, i vetmi prej të cilit presin zgjidhjen.
