Arabia Saudite arreston 13 “terroristë”

Autoritetet në Arabinë Saudite arrestuan 13 “terroristë” të dyshuar, një ditë pas sulmit në një bazë të shërbimeve të sigurisë në veri të kryeqytetit Riad.

Agjencia Saudite e Lajmeve, duke cituar një zëdhënës të sigurisë së shtetit, tha se arrestimet janë pjesë e hetimeve për “aktivitete terroriste”, raporton RFE.

Sipas këtij zëdhënësi, të dyshuarit e arrestuar “kanë qenë duke u përgatitur për të kryer veprimtari kriminale kundër sigurisë së vendit”.

Nuk është ende e qartë se ku janë bërë arrestimet dhe nëse ato lidhen me sulmin e së dielës.

Agjencia Saudite e Lajmeve tha se katër burrat që kanë sulmuar bazën e shërbimeve të sigurisë të dielën në provincën Zulfi, kanë qenë shtetas sauditë.

Të gjithë ata janë vrarë nga forcat e sigurisë, pasi kanë sulmuar ndërtesën e tyre.

Katër policë sauditë janë plagosur po ashtu.

Përgjegjësinë për sulmin e ka marrë grupi militant Shteti Islmaik.

Forcat e sigurisë në Mbretërinë saudite janë sulmuar disa herë viteve të fundit nga xhihadistët e Al-Kaidës dhe të Shtetit Islamik.