Arben Kraja mashtrues, Berisha: Nuk e njoh Vendimin, akt i neveritshëm i komisionit Basha-Brava!

Duke e bërë të qartë se nuk e njeh vendimin e Këshillit të Mandateve, Kryetari i Partisë Demokratike këtë vendim e cilësoi edhe të paligjshëm pasi aty nuk u paraqitën asnjë provë dhe asnjë fakt kundër tij ndërsa duke ju përgjigjur prokurorit Arben Kraja, tha se mashtron sepse ishte kandidat për deputet i Partisë Socialiste dhe ish-oficer i policisë sekrete të komunizmit.

“PD dhe opozita vendoset për motive kryekëput politike në një situatë në të cilën ndodhet partia opozitare në Mianmar, në Rusi dhe në Teheran.

Por, siç rezistojnë opozitarët në Rusi, në Mianmar, në Iran, do rezistojë edhe PD në Shqipëri dhe ajo e tëra do angazhohet në betejën pa kthim për përmbysjen e narkodiktaturës.

Për sa i përket qëndrimit tim, unë e kam bërë të qartë se përsëri nuk e njoh vendimin. Sepse ky vendim është një akt i turpshëm, një akt i neveritshëm i komisionit Basha-Brava.

Po pse është i tillë?

Unë këtu kam vendimin e gjykatës për Saimir Tahirin, e cila thotë se nuk mund t’i heqim pasaportën Tahirit, pa marrë lejen e parlamentit.

Por ajo gjykatëse nuk ishte një vegël e verbër dhe nuk fshihej pas krimit të vet si Irena Gjoka, e shkarkuar nga Sali Berisha, sepse shkarkimi është akti. Shteti nuk është hakmarrës. Por shkarkimi është i mjaftueshëm që ajo të shkruajë se jam shkarkuar prej tij dhe nuk mund të trajtoj çështjen.

Ky është ligji.

Dhe ajo nuk është se e forcon, emërimi, ajo e thellon konfliktin e interesit.

Ajo kishte vetëm një rrugë, të thoshte që nuk marrë dosjen. Por ajo kishte marrë përsipër për arsye që do zbërthehen të gjitha, dosjen e Edi Ramës.

Ndërkohë që një gjykatëse tjetër, po njeri i Kushtetutës dhe ligjit, u thotë prokurorëve që pasaportën nuk mund t’ia marrim pa lejen e parlamentit.

A do mundet Edi Rama me diktaturën e tij të krimit, drogës dhe vjedhjes të qëndrojë në pushtet? Unë kam besim absolutisht që jo.

Ai u hodh në këto veprime pikërisht kur opozita u ngrit në këmbë kundër tij.

Ai e di se në këtë mënyrë nuk mund ta mbajë pushtetin.

Sigurisht që krijon disa vështirësi të përkohshme, por vala e fuqishme e revoltës, e mosbindjes civile të popullit opozitar do i japë atij atë vend që meritojnë të gjithë narkodiktatorët në histori.

Ndaj kjo jo vetëm që nuk e dobëson, por e forcon më shumë luftën e opozitës,” tha Sali Berisha duke e cilësuar vendimin e Këshillit të Mandateve të paligjshëm, pasi aty nuk paraqitën asnjë provë, asnjë fakt kundër tij.

“Vendimi është i paligjshëm. Ju i patë punimet e komisionit, në komision nuk paraqitën asnjë provë, asnjë fakt.

Lexoni pak se çfarë thotë rregullorja e parlamentit për shqyrtimin e kërkesave të prokurorisë.

Nuk plotësohej asnjë kusht.

Kishin vetëm një kërkesë, meqenëse nuk kam zbatuar vendimet antikushtetuese të tyre, të rëndohet ndëshkimi.

Dhe natyrisht në një vend ku parlamenti, prokuroria dhe çdo gjë është në duart e një njeriu, ndodh. Nuk kisha dyshim.

Ndodhi që ata zbatuan një urdhër të atyre që u kanë marrë pushtetin. Nuk ka gjë më të rrezikshme. Kjo vetëm në diktaturë mund të ndodhë.

Kështu që nuk ka asnjë legjitimitet ky vendim i komisionit Balla-Brava.

Por vendimi i parlamentit për mua është abrogimi që i bëjnë ata nenit 73, pika 2. Është problemi i tyre pastaj kjo. Është edhe në Gjykatë Kushtetuese kjo, por nuk pres ndonjë gjë të madhe se vetëkuptohet se çfarë kontrolli ka mbi të.

Por unë në respekt të Kushtetutës, e kam çuar edhe në Gjykatë Kushtetuese.

Edhe njëherë, vendimi i parlamentit merret mbi një vendim të paligjshëm.

Unë nuk mund të pranoj të ligjshëm një vendim që merret mbi bazën e një vendimi të paligjshëm.

Unë e denoncoj vendimin se është i paligjshëm. Vendimi i marrë pa shqyrtuar asnjë dokument, asnjë dosje, por thjesht për rëndim sepse unë kam refuzuar të pranoj dhunimin e Kushtetutës, kjo është marrëzia më e madhe.

Natyrisht unë kam avoketërit, i dëgjoj sepse me votimin e parlamentit mbyllet një cikël i këtij procesi.

Dhe unë në këshillim me avoketërit, do marr vendimet që duhet të marr.

Dje pashë që ajo seancë ishte turpi më i madh në historinë e këtij parlamenti.

Unë mendova se aty do të shkojë dosja, siç thotë rregulli, siç thotë ligji. Dhe të vetmen pyetje që u bë, u tha na nxirr një dokument për rolin që ka luajtur Berisha në ndryshimin e destinacionit.

Mirëpo ai nuk kishte kurajo ta nxirrte se dilte Edi Rama aty. Jo tha, nuk jemi këtu për këto, tha.

Po si nuk je për këto? Po nuk shkon kurrë në parlament prokurori përveçse për këtë.

Dhe vetë ligji i parlamentit e thotë se shqyrtohen një e nga një dosjet,” tha Kryetari i Partisë Demokratike, Sali Berisha ndërsa kishte një përgjigje edhe për prokurorin e SPAK, Arben Kraja:

“Ish-oficeri i policisë sekrete të Enver Hoxhës, kandidati për deputet i PS nuk mund të thotë gjë tjetër veçse mashtrime.

Ndaj a ia vlen të komentojmë ne këtu për një mashtrues të rëndomtë që qëndron në detyrë në kundërshtim me ligjin aktual të prokurorisë.

Që nuk ka as ligj dhe as moral edhe për faktin se është shkarkuar me ligjin e lustracionit, në fakt iniciativë e ish-presidentit Sali Berisha, ai nuk ka tagër të merret me problemet që u mor dje apo në vazhdim.

Ndaj kjo është përgjigjja ime për të. Përgjigjja e saktë.

Ky është problemi. Ai del e paska thënë që nuk jam marrë me politikë.

Po nuk është politikë të hysh në listat e kandidatëve? Po a nuk ishte armë politike Sigurimi i Shtetit? Ishte arma më politike e Partisë së Punës së Shqipërisë.

Më e besuara.

Të mos thotë, kaq!”

Ndryshe, dje Këshilli i Mandateve votoi për ti propozuar Parlamentit për dhënien e autorizimit për arrestimin/heqjen e lirisë së deputetit Sali Berisha në çështjen e privatizimit të ish-kompleksit Partizani.