Ardhja Benetit zgjoi Qeverinë me Plan për Përmbytje, 43 zona me rrezik në Drin-Bunë
Përmbytjet ekstreme të vitit 2010 kanë shërbyer si model krahasimi për atë se çfarë mund të ndodhë me disa zona në Veri të vendit në kushtet kur episode të ngjashme në një shkallë më të ulët nuk kanë munguar.
Ndërkohë ngjarje të tjera, për shkak edhe të ndryshimeve klimatike, janë të parashikuara të ndodhin në vijim.
Një projektplan menaxhimi i rrezikut nga përmbytjet është nxjerrë për konsultim nga Agjencia e Menaxhimit të Burimeve Ujore dhe përfshin zonat ku ekziston rrezik potencial ku përfshihen Drin-Bunë 4, 5 dhe 6 (territori i njësive administrative Shkodër, Ana e Malit, Bërdicë, Dajç, Guri i Zi, Rrethinat dhe Velipojë të bashkisë Shkodër dhe njësinë administrative Bushat të bashkisë Vau i Dejës).
Sipas planit reshjet e dendura pritet të intensifikohen.
“Projektimet tregojnë se do të ketë rritje të reshjeve të rrezikshme për Qarkun e Shkodrës për rreth 1-2 ditë deri në vitin 2030, rreth 2- 3 ditë deri në vitin 2050, 4-5 ditë deri në vitin 2100 në krahasim me vitin 1990.
Projektimet e reshjeve 24-orëshe, siç shihen në tabelën e mëposhtme, rezultojnë mbi vlerat kufi që cilat konsiderohen të rrezikshme dhe në gjendje të shkaktojnë dëm ekonomik.
Në projektime, nivelet e lumenjve në pjesët e sipërme të basenit pritet të rriten për shkak të rritjes së nivelit të detit, duke përkeqësuar riskun për përmbytje, ku sasi të mëdha të tokave bujqësore të punueshme parashikohet të bëhen të papërdorshme për shkak të rritjes së nivelit të lartë të kripës.
Shtimi i tendencës së shpeshtësisë dhe intensitetit të reshjeve të dendura mund të përkeqësojë cenueshmërinë e qarkut të Shkodrës ndaj përmbytjeve, duke kërkuar strategji afatgjata” thuhet në dokument.
Në këtë kontekst plani parashikon mënyrën sesi pasojat mund të minimizohen ndaj përmbytjeve potenciale, masat që mund të merren si dhe bashkëpunimi ndërinstitucional në këtë rast.
Referuar dokumentit nga të gjitha vlerësimet e shtrirjeve të lumenjve, 43 zona u vlerësuan si zona me rrezik potencial të konsiderueshëm nga përmbytjet (ZRRPKP). 33 prej tyre përmbushën kriteret e përcaktimit të nivelit të riskut (ngjyra e kuqe në hartë). 10 prej tyre sapo kanë arritur kriteret e përcaktimit të nivelit të riskut, por u identifikuan si ZRRPKP sipas metodologjisë.
Duke bërë një analizë të hollësishme për çdo rast dhe zonë plani nënvizon se një ndër masat që mund të merren ka të bëjë me shtëpitë e reja dhe infrastrukturën e re që duhet të rregullohen për tu përshtatur kur ka mundësi. Po kështu është e rëndësishme që të vijohet me politikat e pyllëzimit për të shmangur erozionin.
Hartat dhe vlerësimet e rrezikut duhet të mbahen parasysh për infrastrukturën kritike si magazinat, pikat e karburantit apo depozitë, si dhe vendndodhjet në të cilat ruhen fertilizuesit kimik apo kimikate të tjera në zonat e rrezikuara nga përmbytjet.
Me një katalog të plotë masash plani nënvizon parandalimin si fazë, përshtatjen e përdorimit të tokës, parandalimi i rrezikut nga ndërtesat po kështu dhe elementë të tjerë si masat e financimit dhe monitorimin e zbatimit të planit. Gjithsesi edhe pse teorikisht gjithçka është parashikuar edhe vetë Agjencia e pranon se zbatimi i planit mund të jetë sfidues sidomos sa i takon financimit.
“Sfida kryesore për periudhën e implementimit 2023-2028 është niveli i zbatimit të masave të parashikuara në PMRP, zbatim i cili është përgjegjësi e intitucioneve qëndrore dhe lokale, përkatësisht të përcaktuara për çdo masë të parashikuar.
Sfida në vetvete përmban të gjithë elementët e vështirësive që parashikohet të hasen në parashikimin, detajimin dhe projektimin, zbatimin dhe mbikëqyrjen e zbatimit, si dhe çka është më e rëndësishmja financimin.
Monitorimi i zbatimit të masave është një proces relativisht i thjeshtë, por kompleks dhe i vështirë është “përkthimi” i nivelit të zbatimit të masave në nivelin e përmbushjes së objektivave kryesorë dhe specifik të cilat përgjithësisht ndërvaren nga niveli i plotësimit të disa masave njëkohësisht” thuhet në përmbledhjen e planit./Monitor/
