Arkivi i Shtetit, DPA me një risi për studiuesit

Drejtoria e Përgjithshme e Arkivave, DPA, solli sot një risi për studiuesit përkatësisht një komoditet të shtuar për shfrytëzimin e Sallës së Studimit.

Pas modernizimit dhe rikontruksionit total të Sallës së Studimit dhe jo vetëm, për këdo që orari i sallës së studimit ishte pengesë, duke filluar nga data 15 Qershor edhe kjo “pengesë studimore”  u eliminua. Salla e studimit do të funksionojë edhe pasditeve deri në orën 19:00 dhe gjithashtu do të qëndroj e hapur edhe ditën e shtunë.

“Kjo është një risi që u vjen të gjithë studiuesve dhe të gjithë të interesuarve që duan të shfrytëzojnë ambientet e sallës së studimit,” tha në prani të studiuesve, Drejtori i Përgjithshëm i Arkivave, Ardit Bido, duke shtuar se kjo është një ndihmë që iu vjen studiuesve të cilët tashmë nuk kanë nevojë që të marrin leje nga puna e tyre, në mënyrë që të vijnë në Arkiv, por kanë mundësi që të programojnë kohën, të vijnë atëherë kur ata kanë mundësinë dhe të mundet të nxisim në këtë formë studimet, sidomos në fushën Albanologjike, ku Arkivi Qendror Shtetëror është burimi më i madh.

Studiuesja Prof.Dr.Ana Lalaj tha se ky projekt është shumë i rëndësishëm sidomos për studiuesit e rinj ata të cilët aspirojnë për të mbrojtur masterin apo doktoraturën, të cilët janë në marrëdhënie pune. Duke ardhur pasditeve, duke ardhur edhe të shtunave, kjo i vjen në ndihmë edhe personave që vijnë nga rrethet, jo vetëm studiuesve nga Tirana.

Ndryshe, të pranishëm në këtë ceremoni ishin edhe Drejtori i Arkivave të Ministrisë së Mbrojtjes, Teki Kurti, Drejtori i Kërkimeve Shkencore në Akademinë e Sigurisë, Xhavit Shala, Pedagogu i Fakultetit Histori-Filologji, Artan Puto, dhe studiues të tjerë për të cilët dikur ky orar i shfrytëzimit të Sallës së Studimit ishte pengesë serioze, sot ata e mbështesin duke theksuar se kjo nismë do të ndihmoj dhe lehtësoj dukshëm punën studimore.