Armë në makinë, ndalohet deputeti grek dhe polici që e shoqëronte
Një deputet dhe një polic grek janë shoqëruar në Komisariatin e Sarandës pasi u ndaluan nga një postobllok policie në aksin rrugor “Sarandë-Gjirokastër”, në vendin e quajtur “Ura e Kranesë”.
Polici që shoqëronte deputetin u arrestua pasi kishte një armë me vete, të cilën nuk e kishte deklaruar në doganë.
Deputeti grek u shoqëruar në polici dhe më pas është lënë i lirë.
Mësohet se të dy ishin duke shkuar në Gjirokastër për të marrë pjesë në ceremoninë e të 40-ave të Konstandinos Kaçifas.
Ende nuk dihet identiteti i deputetit apo i policit që tashmë është arrestuar nga pala shqiptare.
Njoftimi i Policisë
Policia arreston në flagrancë një shtetas grek me detyrë punonjës policie.
Sekuestrohet në cilësinë e provës materiale një armë zjarri e tipit “pistoletë” me 6 fishekë.
Nga Specialistët për Hetimin e Krimit në Komisariatin e Policisë Sarandë u bë arrestimi në flagrancë i shtetasit:
– M. G, 35 vjeç, banues në Gumenicë, Greqi (me detyrë punonjës policie në Igumenicë, Greqi).
Arrestimi i tij u bë pasi më datë 08.12.2018, rreth orës 09.45, në aksin rrugor “Sarandë-Gjirokastër”, në vendin e quajtur “Ura e Kranesë”, ky shtetas duke udhëtuar në drejtim të fshatit Bularat, Gjirokastër është kapur në flagrancë nga shërbimet e policisë me një armë zjarri pa leje, e tipit “pistoletë” me 6 fishekë.
Materialet në ngarkim të tij i kaluan Prokurorisë pranë Gjykatës të Shkallës së Parë Sarandë për veprime të mëtejshme për veprën penale “Prodhimi dhe mbajtja pa leje e armëve luftarake dhe e municionit”, parashikuar nga neni 278 i Kodit Penal.
