“Armëpushim treditor”, reagon Shtëpia e Bardhë: Trump dëshiron armëpushim të përhershëm!
Pasi Presidenti rus Vladimir Putin njoftoi një armëpushim treditor nga 8 deri më 11 maj, kur Moska shënonr 80-vjetorin e përfundimit të Luftës së Dytë Botërore, ka reaguar Shtëpia e Bardhë duke e bërë të qartë se Presidenti i Shteteve të Bashkuara, Donald Trump, dëshiron armëpushim të përhershëm në Ukrainë dhe jo ndërprerje të përkohshme të luftimeve
“Presidenti dëshiron të shohë një armëpushim të qëndrueshëm që do të ndalojë vrasjet dhe gjakderdhjen”, tha zëdhënësja e Shtëpisë së Bardhë, Karoline Leavitt, duke shtuar se Presidenti Trump mbetet optimist për mundësinë e arritjes së një marrëveshjeje.
“Por ai është gjithnjë e më i frustruar me udhëheqësit e të dyja palëve, të cilët duhet të ulen në tryezë dhe të negociojnë një rrugëdalje nga konflikti,” tha Leavitt duke theksuar se takimi i fundit i Presidentit Trump me Presidentin e Ukrainës, Volodymyr Zelenskyy, në Bazilikën e Shën Pjetrit tregoi se Trump dëshiron të jetë një president që sjell përsëri paqen, siç ishte në mandatin e tij të parë.
Ndërsa nga Ukraina ka reaguar Ministri i Jashtëm, Andriy Sibiha, përmes rrjetit social X duke theksuar se nëse Rusia vërtet dëshiron paqe, duhet t’i ndalë luftimet menjëherë.
“Pse të presim deri më 8 maj? Nëse zjarri mund të ndalet tani dhe të vazhdojë pa ndërprerje për të paktën 30 ditë, kjo do të tregonte se armëpushimi është i vërtetë dhe jo vetëm për një paradë,” tha Andriy Sibiha duke shtuar se Ukraina është e gatshme të mbështesë një armëpushim të përhershëm, të qëndrueshëm dhe të plotë, të cilin e ka propozuar vazhdimisht.
Ndryshe, sot Forcat Ajrore të Ukrainës njoftuan se Rusia lëshoi gjithsej 166 dronë drejt territorit ukrainas gjatë natës dhe mëngjesit të sotëm, ku mbrojtja ajrore ukrainase rrëzoi 40 dronë, ndërsa 74 dronë të tjerë u çorientuan dhe devijuan nga objektivi i tyre.
Dhe, po sot, Kremlini njoftoi se planifikon të ndalojë luftimet në Ukrainë nga mesnata e 7 majit deri më 11 maj, për të shënuar 80-vjetorin e përfundimit të Luftës së Dytë Botërore. Kremlini tha se priste që Ukraina ta pranonte armëpushimin, por paralajmëroi se nëse ai shkelej, forcat ruse do të përgjigjeshin në mënyrë adekuate dhe efektive. Rusia shprehu edhe një herë gatishmërinë e saj për negociata paqeje pa parakushte.
