“Arrest shtëpie”, Apeli i GJKKO nuk ndryshon masën për Ish-Kryeministrin Sali Berisha
Gjykata e Posaçme e Apelit për Korrupsionin dhe Krimin e Organizuar, Apeli i GJKKO, nuk ndryshoi masën për Ish-Kryeministrin Sali Berisha.
Sipas vendimit të marrë nga gjyqtarja Ilirjana Olldashi, Kryetari i PD dhe deputeti Sali Berisha do vazhdojë të qëndrojë në masën e sigurisë, arrest shtëpie!
Kjo që po ndodhë në SPAK dhe GJKKO nga 30 dhjetori i vitit 2023, Avokati i Dr.Berishës, Genc Gjokutaj, e cilësoi estradë juridike.
“Gjykata miratoi vendimin e shkallës së parë, afërmendsh siç thotë SPAK. Por çfarë po bën SPAK? Kjo është pjesa më shqetësuese e këtij procesi. Ky SPAK e ka devijuar objektin e hetimit.
Gjykata miratoi vendimin e shkallës së parë. Por çfarë po bën SPAK-u kjo është pjesa më shqetësuese e këtij procesi ligjor që e ka zhvendosur fokusin e hetimit në probleme të nivelit teknik e financiar që nuk kanë lidhje me procedimin dhe korrupsionin për të cilin është regjistruar kjo çështje.”
Avokat Genc Gjokutaj tha se afatet e hetimit i ka përcaktuar ligji dhe këta janë duke i shtyrë ndërkohë që Berisha është duke qëndruar në paraburgim po kryhen veprime që nuk kanë lidhje me veprën penale të korruspionit.
“Ne do të vazhdojmë rrugën tonë se ne nuk arrijmë të kuptojmë sesi kryhen veprime jashtë funksionit dhe qëllimit të çështjes. Ata po bëjnë akt ekspertim kontabël për të parë llogaritë dhe lëvizjet e parave. Nuk ka problem as midis bashkëpronarëve, as midis shitësve dhe blerësve.
Nuk ka element të tillë. Problemi është që një akt ekspertimi kontabël nuk bëhet pas 3 vjetëve e gjysmë hetimi por menjëherë se nëse ka lëvizje të shumave që nuk korrespondojnë me kostot reale atëherë për çfarë flitet?
Afatet e hetimi i ka përcaktuar ligji, këta janë duke i shtyrë. Berisha është duke qëndruar në paraburgim, ndërkohë që po kryhen veprime që nuk kanë lidhje me veprën penale të korruspionit. Hajde shpjegojeni ju dhe unë se ç’është kjo estradë juridike që këta po zhvillojnë.”
Ndryshe, Ish-Kryeministri Sali Berisha ndodhet i izoluar në banesën e tij prej datës 30 dhjetor 2023, me vendim të Gjykatës së Posaçme për Korrupsionin dhe Krimin e Organizuar, për çështjen në hetim lidhur me privatizimin e ish-kompleksit Partizani.
Vendimi
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtarja Iliriana Olldashi, sot më 18.06.2024, shpalli vendimin mbi çështjen penale nr. 130 akti, datë 11.06.2024 regjistrimi, regjistruar mbi ankimin e personave nën hetim/ankues S.B. dhe J.M., me objekt: “Ankim ndaj vendimit nr. 245 akti, datë 21.05.2024 të Gjykatës së Posaçme të Shkallës së Parë për Korrupsionin dhe Krimin e Organizuar (me objekt: Informacion dymujor në kuadër të procedimit penal)”, dhe vendosi:
Miratimin e vendimit nr. 245 akti, datë 21.05.2024 të Gjykatës së Posaçme të Shkallës së Parë për Korrupsionin dhe Krimin e Organizuar.
