Arresti i “Foltores”!
nga Agim Popoci
“Foltorja” me demokratët shqiptarë në Amerikë sot pësoi një arrest në mediat shqiptare duke injoruar një realitet që po cenon regjimin e Edi Ramës! Në mungesë të akuzave për shqiptarët që jetojnë e punojnë në Amerikë dhe deri më sot vetëm të mira i kanë dhënë kombit dhe shtetit shqiptarë, halabakët që sot drejtojnë mediat nuk e panë të arsyeshme ti kushtojnë qoftë dhe një titull në mediat e tyre një eventi i cili bashkoi demokratët shqiptarë, jo për ta zhbërë “Berishën Non Grata” por për ti dhënë fund një regjimi që shkatërroi Shqipërinë.
Sot ata i bënë arrest “Foltores” por a e ndryshojnë dot këta halabakë realitetin, siç bënë në vitin e zi 1997!
Me të drejtë “Koha Jonë” u cilësua si Gjenerali i Kryengritjes komuniste të vitit 1997, dhe në mungesë të një ambasadoreje që e shpall “Sali Malokun non grata”, kjo gazetë ishte burimi i vetëm frymëzues për ta shporrë atë nga pushteti. Dhe, ia arriti qëllimin, krijoi një realitet të ri tek shqiptarët e izoluar që nuk venin dot në Tiranë ama “Koha Jonë” shkonte tek ata!
Shkujdesja e demokratëve me rikthimin në pushtet në Shqipërinë ku biznesmenët ekskluzivisht të majtë ishin dhe pronar të mediave, bëri që sot shumë gjeneralë ti qepen, jo vetëm shkatërrimit të “Sali Malokut” por edhe Partisë Demokratike. Kjo kastë e nikollëve vërtetë arriti ta marrë kalanë nga brenda duke emëruar dhe Sekretaren për të Përndjekurit Politikë të PD një partizane të zellshme të vitit të zi 1997, por injoruan një fakt shumë të rëndësishëm, sot nuk e ndryshojnë dot realitetin.
Sot Fania me shokë mund ti çojnë mesazhe Edi Ramës dhe Lulzim Bashës duke u mburrur se çfarë po i bëjnë “Foltores” dhe Sali Berishës, por mediat e tyre as nuk lexohen, as nuk shikohen dhe as që janë më pikë reference e asaj çfarë po ndodhë në këtë vend ku mbizotëron krimi.
Sot Edi Rama ka lënë komunistët pa “Zërin e Popullit” por ata kanë gazetën “Dita” që me krenari e shfletojnë për të konfirmuar jo ku është Lulzimi apo Saliu me “Foltore”, por partia e tyre e dashur që vazhdon të jetë në pushtet përkundër krimeve të papara që i ka bërë dhe i bënë këtij populli, pa ndryshuar fare realitetin.
Nga ana tjetër, nikollët mund ti bëjnë qefin Lulzimit duke i thënë se “Foltorja” është pakicë madje dhe strukturë paralele serbe, por realitetin nuk e ndryshojnë dot dhe ata që interesohen për këtë rrugëtim, falë ecjes përpara të teknologjisë kanë se ku të informohen.
Këtë e konfirmoi “Foltorja” në New Jersey. Agim Rexha, ai i cili kontribuoi me Vatrën pa spiunët e Sigurimit të Shtetit të përafroi Amerikën me Shqipërinë pluraliste dhe familjen Bush, i dha mesazhe të qartë jo vetëm demokratëve shqiptarë dhe halabakëve që sot janë pronarë të mediave në Tiranë!
President nderi i “Vatrës” në SHBA, Agim Rexha, nuk iu drejtua nikollëve e fanëve për t’ia publikuar apelin, por dukshëm i shqetësuar ai iu dtrejtua vetë Lulzim Bashës:
“I bëj thirrje dhe lutje Lulzim Bashës nga SHBA, që të respektojë vullnetin e shumicës së demokratëve dhe të marrë pjesë në Kuvendin e 11 Dhjetorit, përndryshe të japë dorëheqje të menjëhershme. Ne nuk duam të ndodhë me PD-në ajo që ndodhi me LDK-në pasi Rugova ndërroi jetë. Ne duam një PD të fortë dhe një PD e fortë është Shqipëria demokratike, Kosova më e fortë, shqiptarët në të gjitha viset që janë, më të fortë. Prandaj të lutem zoti Basha në datën 11 dhjetor bashkëngjitu Kuvendit ose jep dorëheqjen!”
Nga buron kjo thirrje dhe pse është i shqetësuar President nderi i “Vatrës” për realitetin e krijuar në Shqipëri!
Me vdekjen e Kryetarit të LDK, Ibrahim Rugova, sot ne nuk kemi vetëm një LDK ndryshe, por dhe një mutacion të frikshëm të pavarësisë së Kosovës, arsye të cilat i njeh shumë mirë Agim Rexha jo duke lexuar mediat e nikollëve dhe fanëve.
A mund të ndodhë e njëjta gjë edhe në Shqipëri?! Sejmenët e Conchitës mund të vazhodjnë të kakarisin për “Foltoren” e pakicës dhe strukturat paralele serbe, por me policinë e Edi Ramës plotësisht të politizuar, dhe zellin e madh që ka ai për shkatërrimin e PD-së, përmasat e përgjakjes me vendimet e Kuvendit Kombëtar të PD më 11 Dhjetor, mund të jenë shumë më të frikshme se ato të Kuvendit të karrigeve të LDK, me Nexhat Dacin e Fatmir Sejdiun!
A mund të shmanget kjo përplasje?! Këtë e kanë në dorë në masën më të madhe ata që krijuan tensione në mesin e anëtarësisë së Partisë Demokratike dhe janë rreshtuar rreth Kryetarit aktual të PD, si dhe nismëtarët e “Foltores” me liderin historik në krye!
Kështu, për të mos u ekzaltuar nga servilizmi i Fanes dhe ekranet e hapura për intervista në mediat e kontrolluara nga Edi Rama, dhe nga ana tjetër radhët e shtuara gjithnjë e më shumë në “Foltore”, mjafton të analizohet me kujdes mesazhi i akademikut të mençur dhe të urtë, Mark Krasniqi, i thënë në Grupin Parlamentar të LDK, gjashtë muaj para Kuvendit të karrigeve në LDK ku nisi shkatërrimi për të mos u bërë kurrë më partia e Ibrahim Rugovës:
“Unë po e vërej një përçarje në LDK. Kjo do të ishte një tragjedi për Kosovën. Nëse kjo parti përçahet në grupe të ndryshme… Ju lutem, të zezës do t’i themi të zezë, të bardhës do t’i themi e bardhë. Ju lutem, për hir të Kosovës, duhet ta sakrifikojmë edhe veten, e jo më dëshirat ose ambiciet që të jetë dikush ose mos të jetë dikush tjetër në këto poste…”
Këshilla e Akademik Mark Krasniqit nuk u dëgjua, pas këtij Kuvendi të përgjakshëm në LDK u bënë reforma të thella, u ndërrua dhe Kryetari, por Lidhja Demokratike e Kosovës edhe me Isa Mustafën në krye, ngeli hyzmeqare e Kryeministrit Hashim Thaçi.
Pretendim, të cilin e kishte dhe po e jetëson Kryeministri Edi Rama!
