Arrestimet në Bashkinë Fier, nga mosfiskalizimi i parkimit publik te ulja e taksave për disa biznese
Pas një hetimi disa mujor të Seksionit për Hetimin e Krimeve Ekonomiko-Financiare në DVP Fier, nën drejtimin e Prokurorisë së Fierit, është finalizuar operacioni i koduar “Parking”, që çoi në masa të shumta sigurie ndaj zyrtarëve aktualë dhe ish-zyrtarëve të Bashkisë Fier dhe administratës tatimore duke përfshirë ish-drejtoreshëN e Taksave dhe Urbanistikës, si dhe ish-nënkryetare e Bashkisë Fier, Adela Hysenaj.
Në fokus të hetimeve ishte mosarkëtimi i rreth 40 milionë lekëve nga parkimi nëntokësor në qytet, për shkak të mospajisjes me kasë fiskale dhe favorizimit të subjekteve tregtare, përmes uljes së padrejtë të taksave.
Sipas Policisë, këta zyrtarë kanë vepruar në kundërshtim me ligjin dhe kanë krijuar mungesë të ardhurash në buxhetin vendor, duke dëmtuar interesin publik dhe duke favorizuar biznese të caktuara.
Sipas hetimeve të Policisë dhe Prokurorisë së Fierit, abuzimi kishte në thelb dy forma të organizuara të shpërdorimit të detyrës:
Mosfiskalizimi i parkimit nëntokësor
Zyrtarë të Bashkisë Fier, përfshirë ish-zv/kryetaren dhe ish-drejtoreshën e Taksave A. H., si dhe drejtorë të nivelit të lartë në Tatime, nuk zbatuan detyrimin ligjor për të pajisur me kasë fiskale shërbimin e parkimit nëntokësor që administrohej nga Bashkia.
Kjo shmangie sistematike bëri që të mos arkëtohej në buxhetin lokal shuma prej rreth 40 milionë lekësh, e cila duhet të ishte siguruar nga përdoruesit e këtij shërbimi. Pagesat për parkimin, megjithëse të mbledhura, nuk kalonin në rrugë zyrtare dhe nuk regjistroheshin në sistemin tatimor.
Ulje e qëllimshme e taksave për biznese të caktuara
Në një tjetër element të skemës, zyrtarë të Bashkisë Fier, nëpërmjet manipulimit të vlerësimeve fiskale dhe tarifore, ulnin në mënyrë të pajustifikuar taksat për subjekte të caktuara private. Këto lëshime të favorshme dyshohet se janë bërë kundrejt përfitimeve personale, duke u dhënë avantazh të padrejtë disa bizneseve në treg.
Në listën e personave ndaj të cilëve janë marrë masa sigurie përfshihen:
– Adela Hysenaj , 34 vjeçe, ish-drejtoreshë e Taksave dhe Urbanistikës, si dhe ish-nënkryetare e Bashkisë Fier, është vendosur në “arrest shtëpie” për shpërdorim detyre dhe ushtrim ndikimi të paligjshëm ndaj funksionarëve publikë.
– Vasil Ceku, 41 vjeç, drejtor në Drejtorinë Rajonale Tatimore Fier, është vendosur në arrest shtëpie dhe pezullim nga detyra, i dyshuar për shpërdorim detyre.
– Anisa Cjapi, 38 vjeçe, drejtoreshë e Taksave dhe Tarifave Vendore në Bashkinë Fier, është pezulluar nga detyra për shpërdorim detyre.
– Martin Dodi, 57 vjeç, sekretari i përgjithshëm i Bashkisë Fier, është ndaluar të ushtrojë funksione publike dhe t’i lërë kufijtë e vendit, pasi dyshohet për ushtrim të ndikimit të paligjshëm ndaj funksionarëve të tjerë.
