Arrestimet në Brezovicë, Veton Surroi e Gentjan Sula dyshohet se dhanë 410 mijë euro ryshfet

Bashkëpronarë të kompanisë “Stella Consulting”, për të cilën Prokuroria pretendon se ka dhënë ryshfet Bratislav Nikoliçit, në këmbim të lejeve ndërtimore në Brezovicë, janë publicisti kosovar, Veton Surroi dhe biznesmeni nga Tirana, Gentjan Sula.

Në këmbim të lejeve për ndërtim të shfrenuar në qendrën e skijimit në Brezovicë, raporton Gazeta Express, dyshohet se ish-kryetari i Shtërpcës, Bratislav Nikoliç, ka marrë ryshfet nga disa pronarë të vilave e komplekseve atje.

Sipas dosjes së hetimeve, detajet e së cilës i ka publikuar Kallxo, një pjesë të madhe të ryshfetit që dyshohet se e ka marrë ish-kryetari i Shtërpcës, vjen prej një kompanie, ku aksioner është Veton Surroi. Emri tij është përmendur disa herë për ndërtime në Brezovicë, por ai ka thënë se lejet i ka marrë ligjshëm. Prokuroria thotë diçka krejt tjetër.

Dyshimet e Prokurorisë janë këto: Nikoliç ka pranuar ryshfet një shumë prej 210 mijë eurove për të dhënë leje ndërtimore të vikend-shtëpizave për investitorin e “Stella Consulting”, dhe 200 mijë euro të tjera për dhënien e lejes ndërtimore për objektin hotelier të të njëjtit investitor.

Në Agjencinë e Regjistrimit të Bizneseve emri i Veton Surroit figuron në listën e aksionarëve me 30%, derisa aksionari tjetër është Gentjan Sula me 70% të aksioneve./Express/