Arrestimet në MINT, Albin Kurti: Nuk ka kurrfarë korrupsioni!

Pas arrestimit të zyrtarëve në Ministrinë e Industrisë, Ndërmarrësisë dhe Tregtisë, MINT, ka reaguar Kryeministri i Kosovës, Albin Kurti, i bindur se nuk ka kurrfarë korrupsioni në qeverinë e tij, derisa shprehu besimin e plotë për ministren Rozeta Hajdari, akuzoi opozitën si elitë të vjetër politike që ka qenë e korruptuar e tash është e organizuar.

“Nuk ka kurrfarë korrupsioni e keqpërdorimi. Unë kam besim të plotë në ministren Rozeta Hajdari dhe në punën e saj. Pas luftës në Ukrainë, kur kishte krizë globale, ministria që ajo drejton, i ka blerë rezervat dhe i ka mbushur depot në një kohë kur të gjithë kufijtë ishin mbyllur e pothuajse të gjitha shtetet kishin ndaluar eksportin|,” shprehet Albin Kurti përmes rrjetit social Facebook duke shtuar se Qeveria e Kosovës është e përgjegjshme dhe e drejtë, e cila i ka sjellë progres ekonomik dhe demokratik të paparë në Kosovën e pasluftës.

“Rezervat shtetërore i kemi gjetur 300 mijë euro e i kemi bërë 25 milionë euro për dy vite. 97 për qind të vlerës së blerë vitin e kaluar ka mbërrirë në Kosovë, përfshirë këtu 99,5% të sasisë së grurit që tashmë ndodhet në depo në vendin tonë. E për pjesën e mbetur, kompanitë furnizuese kanë obligim të hapur për ta përmbushur kontratën, dhe nëse nuk e bëjnë këtë janë procedurat ligjore.”

Kurti thotë se qeveria me ndërgjegje të pastër dhe punë të mira natyrisht se përbën ndryshim rrënjësor karshi qeverisjes 20 vjeçare tё Kosovёs. Si e tillë ajo, thotë Kryeministri i Kosovës, domosdo prodhon si fituesit ashtu edhe humbësit e saj.

“Përderisa fitues janë gjithë qytetarët e vendit (familjet përmes shtesave universale pёr fёmijё, nёnat lehona, përfituesit e ndihmave sociale, të rinjtë, studentët, punëtorët, pensionistёt, tё papunёt, bizneset e rregullta) humbësit janё tё paktё nё numёr, por jo pak tё organizuar. Humbësit i gjeni tek elita e vjetër dhe e korruptuar politike, te gjykatës dhe prokurorë të saj, te mediat e keqpërdoruara pёr mbёshtetje tё krimit,” shprehet Kurti duke identifikuar humbësit e mëdhenj.

“Përpjekjet e tyre për ta ndryshuar situatën janë në shërbim të planit për ta kthyer ish sistemin e kalbur e tё korruptuar. Nё rastin mё tё mirё ata po pёrpiqen pёr tё ruajtur disi pasurinё e akumuluar me hajni e korrupsion, monopolet artifciale e tё dёmshme që i kanë bërë me krim e keqpёrdorim tё detyrёs zyrtare. Por, do tё dёshtojnё si nё aspiratën e tyre pёr kthim tё keqpёrdorimit, ashtu edhe nё synimin pёr përbaltjen e atyre qё kontribuojnë pёr moskthim tё asaj periudhe.”

Kryeministri Kurti është i bindur gjithashtu se do tё dёshtojnё edhe nё frikёsimin e secilit qё i bashkohet karvanit tё reformave progresiste dhe zhvillimit gjithëpërfshirës.

“Piskamat, shpifjet dhe aksionet pompoze tё tyre do dëgjohen gjithnjё e mё rrallё. Me qindra raportime zyrtare e kallëzime penale i kanë deponuar ministritë tona për krimin e korrupsionin që e kemi gjetur, por, përgjithësisht, kjo nuk i ka bërë përshtypje prokurorisë së shtetit. Reformat tona nuk do arrijnë t’i ndalin. Rastet e akumuluara tё krimit e tё deponuara nga kjo qeveri nuk do mund t’i fshehin edhe shumё gjatё.”

Ndryshe, Policia e Kosovës me urdhër të Prokurorisë Speciale, ka arrestuar sot tre persona, nën dyshimet për keqpërdorim me blerjen e rezervave shtetërore. Të arrestuar për veprat penale “keqpërdorim i detyrës zyrtare” dhe “dhënie e ndihmës në kryerjen e veprës penale të keqpërdorimit të detyrës zyrtare” janë Hafiz Gara – drejtori i Departamentit të rezervave shtetërore në MINT, Irfan Lipovica – drejtorit të Departamentit për integrime evropiane dhe afaristi Ridvan Muharremi.