Arrestimet në PS, Kryekomunisti Rama: S’jemi në komunizëm, ata konsiderohen të pafajshëm deri…

Pas mbledhjes së Kryesisë së PS, Kryeministri Edi Rama ka përsëritur sot se përgjegjësia është individuale dhe kjo vlenë edhe për deputetin e PS-së, Alqi Bllako, për të cilin SPAK kërkoi arrestimin e tij.

I dehur nga dogma e kuqe që ligjëroi para importuesve dhe eksportuesve shqiptarë, njeriu që ka akuzuar Kryeministrin Sali Berisha për çdo gjë që ka ndodhur gjatë periudhës 2005-2013, sot tha se nuk jemi në komunizëm dhe faji është individual. Po, është ky Edi Rama që nuk i pengon kur kryetarët e degëve, deputetët dhe ministrat të ndërhyjnë për tendera por sot thotë të gjithë janë të barabartë.

Pse patronazhistët nuk janë të barabartë me të tjerët, këtë nuk e tha, por ata vazhdojnë dhe veprojnë në këtë Shqipërinë komuniste të Edi Ramës, ku patronazhistëve u jepen të menaxhojnë të dhënat e qytetarëve deri në këstin e kredisë e ata nuk kanë të drejtën të dinë asgjë për këta kriminelë në shërbim të Partisë Socialiste që u futën pa leje në jetën private të çdo qytetari shqiptar.

E kryetari i këtyre komunistëve të ri shqiptar vazhdon ndërsa bashkëpartiakët e tij po mbushin burgjet:

“Nuk ka përgjegjësi kolektive, zgjedhjet e njerëzve në jetë me të cilët vendos të lidhësh jetën, të bësh një rrugë të caktuar në punë, zgjedhjet e njerëzve bazohen në një sërë arsyesh dhe kriteresh që nuk prezumojnë për askënd se kush zgjedh është përgjegjës. Nëse i zgjedhuri prej tij, në një moment të caktuar shkel ligjin. Për këtë arsye gjërat janë krejtësisht të ndara.

Sot që flasim, përgjigja ime është një përgjigje në parim. Në rastin konkret dhe në të gjitha rastet nuk e caktoni as ju e as unë, e cakton drejtësia. Deri në momentin që drejtësia do të thotë fjalën e fundit, ata konsiderohen të pafajshëm. Në komunizëm, diktaturë, është ndryshe. Bëhen gjyqe popullore, goditje me mikrofona. Ndryshimi është që këtu sot për shkak të reformës në drejtësi dhe shumicës këtu, kemi arritur në pikën që s’ka mburoja politike.

Janë të ndara gjërat. Unë s’jam as prokuror e as gjykatës. Prokurorin e gjykatësin e shoh që e bëjnë shumë, në parlament, media, është e drejta e tyre. Ajo që unë di të them është që sot është një Shqipëri tjetër. Nuk duhet të çuditen që cilido qoftë nga shumica, pakica, kërkohet nga drejtësia të përgjigjet.

Nuk i komentoj vendimet e SPAK, për një arsye themelore, sepse për mua, përtej pjesës njerëzore qëndron misioni që kjo rrugë duhet të vazhdojë përpara e pa penguar nga forca garantë. Mund të ketë momente jo fatlume, vendime shumë të diskutueshme, këto janë të natyrshme në një proces zgjimi, pas 500 vitesh padrejtësi, në këtë vend s’ka pasur drejtësi. Kjo është arsyeja se përse ju bini në kurthin e të qenit të padrejtë,” tha Edi Rama duke u munduar të bindë miletin që në shtetin që ai qeverisë, përpara ligjit nuk ka të privilegjuar.

“Deputetët janë të popullit, individët janë të vetes dhe përpara ligjit nuk ka deputet, nuk ka ministra, nuk ka forcë, nuk ka të privilegjuar, janë të gjithë të barabartë dhe habitem që ka akoma nevojë për të tilla pyetje, ndërkohë që gjithçka po ndodh nuk është asgjë tjetër veçse përgjigjja për të gjithë ata që nuk besonin se në Shqipëri do të bëhej një reformë në drejtësi.

Nuk besonin se në Shqipëri do të vinte dita që edhe njerëz me imunitet dhe me pushtet do të shkonin para drejtësisë.

Nuk besonin që këtë reformë ne ndërmorëm dhe unë personalisht me shumë vendosmëri jo vetëm, por së bashku me PS e kemi udhëhequr dhe do vazhdojmë ta mbështesim jo për të kapur drejtësinë por për të krijuar kushtet që me kohë, me durim, një proces reformimi i drejtësisë të bëjë të mundur që të ketë një Shqipëri të drejtë për gjeneratën tjetër.

Kështu që në nivelin personal, njerëzor, patjetër që jam shumë i keqardhur, por në nivelin e detyrës sigurisht që i shoh këto që ndodhin si rezultat i asaj që kemi bërë.”

Duke folur për çështjen e inceneratorëve dhe implikimet e zyrtarëve të PS, Edi Rama tha se është shumë krenarë për ato vepra.

“Së pari që nga fakti që akoma flitet për inceneratorë është një shërbim pa cilësi që i bëhet publikut. Ne nuk kemi ndërtuar inceneratorë, por impiante të prodhimit të energjisë nga mbetjet. Ne kemi ndërtuar impiante të prodhimit të energjisë. Jam shumë krenar për ato vepra, veprat janë aty. Është një punë kaq e rëndësishme sa sot territore të Shqipërisë marrin frymë lirisht.

Nëse në këtë proces apo çdo proces tjetër, individë të caktuar përveçse bëjnë punën e shtetit dhe të xhepit të tyre, kjo nuk ka lidhje me qeverinë, kjo ka lidhje me një cenim të ligjit dhe një përgjegjësi, që në rast se drejtësia e nxjerr në pah, do të thotë që të jemi të gjithë shumë të kënaqur që kush përdor detyrën shtetërore për përfitim personal, do përfundojë atje, ku deri dje nuk ua priste mendja njerëzve se do përfundonin njerëzit me pushtet.

Qëndrimet e mia janë qëndrime që nuk do i shihni të lidhura me personat. Në sensin që këta njerëz kanë të drejtën e prezumimit të pafajësisë deri në fund. Ne kemi për detyrë të shtyjmë përpara reformën në drejtësi.

Ajo që po ndodh sot në Shqipëri është një vlerë e re që po krijohet nga PS, nga kjo shumicë qeverisëse. Nuk është shumica që ka kapur drejtësinë, nuk është shumica që ka bërë reformën në drejtësi për të goditur ata që ka kundër. Është shumica që thotë ne duam një Shqipëri ku drejtësia të mos shohë as majtas, as djathtas, por drejtë. Kush, duke u rreshtuar majtas ose djathtas po nuk ecën drejt, por hedh një hap drejtë e një hap shtrembër, po ra në rrjetën e drejtësisë do përgjigjet,” tha Rama ndërsa nuk e sheh të arsyeshme as bëjë ndryshime në qeveri.

“Ndryshime në kabinet s’ka arsye pse të ketë. Ne kemi bërë mbledhje që ka në qendër të vëmendjes kongresin e PS, agjendën e kongresit, temat, formën e re, statutin e ri të PS. Kemi folur për të mbledhjen e të dhënave të fshehta të të gjithë përfaqësuesve të grupit parlamentar dhe kryesisë, për opinion për presidentin e republikës.”